1 Thatihzy Rona第29章

¹ Chatawcha Abei Davi ta zawpi zydua hnohta, “Khazohpa a tlypa ei sawchapawpa Sawlawmaw he, hawtipa châ ta, khâpahmah pahno mâh leipa ta, a hria awpa hra cha rôhnah tlôh ta; o rôhnahpa cha chyhsa châta châ leipa ta ABEIPA Khazohpa châta tlao châ tlôh ta."

² Chatanchata ei Khazohpa o châta ngôh hmo châta ngôh zy, tâkâri hmo châta tâkâri zy, dawh hmo châta dawh zy, thua hmo châta thua zy, tho hmo châta tho zy cha thata a chhuahnoh haw na ta, a pangia nawpa ta bery lô zy, alôsôhpa zy, a bai awpa alô a ngiapa chi nanopa nata alôsôhpa chi to nata awlôteihpa hluhpi zy chhao ta.

³ Chaleipa chhao cha ei Khazohpa o he khokhei ngaita na ta, keima sôh ngôh nata tâkâri zy chhao o pathaihpa châta ei chhuahnohpa zydua rei leipa heta ei Khazohpa o châta ei pie.

⁴ Cha cha pâhchhôzy pahu nawpa ta Ôphira ngôh, ngôh talent sâh thôh nata tâkâri pasuapa talent sâh sari,

⁵ hmâna kyh nanopa liata chyhsa a thaipazy hmâ awpa ta ngôh hmâna awpa ta ngôh zy, tâkâri hmâna awpa ta tâkâri zy a châ. Atanoh heta ABEIPA châta aly ngaitapa ta a pie pasaipa ahy e a y?” tah ta.

⁶ Chatanachata chhôhkha pawhrâhpa zy, Izarel pho hyutuhpa zy, sâhkha hyutuhpa zy nata zakha hyutuhpa zy abei rai hriapa sahlao hyutuhpa zy chhao aly ngaitapa ta pie ei ta.

⁷ Khazohpa o sa nawpa ta ngôh talent sâh pangawh nata darik ngôh thy kha, tâkâri talent thy kha nata dawh talent thy kha nata sâh charie, thua talent thy sykha pie ei ta.

⁸ Chatawhcha alôsôhpa a hneipa zy chata Kasao chyhsa Zahiel a vaopa ABEIPA sôh liata soh ei ta.

⁹ Chatanachata zawpi zy cha thapha ngaitapa ta y ei ta, palôhrupa miakha phaohpa ta aly ngaitapa ta ABEIPA ama piepa vâta; Abei Davi chhao thapha ngaitapa ta y ta.

¹⁰ Chavâta Davi ta zawpi zydua hmiakô liana chata ABEIPA lâta alyna bie reih ta; Davi chata: “Hy ABEIPA, eima mahpaw Izarel Khazohpa y, chhâzaw ta reithaipa ta y mah y.

¹¹ Hy ABEIPA y, rôhnahna zy, hmotaotheina zy, palyupalihna zy, tiahna zy, abeina zy he na eih châ tlôh ta; hy ABEIPA, khihnarâh cha na eih châ ta, chyhsa zydua liata chônô chaipa na châ.

¹² Hneirôna nata palyupalihna zy he nâ tawhtapa châ ta, ato chô liata bie hnei chi ta. Chatawhcha hmotaotheina nata thatlôna na ku liata y ta; na ku liana heta chyhsa zydua parôhnahsana nata thatlôna pie theina a y.

¹³ Chatanachata eima Khazohpa y, alyna bie cha hlâ pi ta, na moh rôhnahpa he eima reithai na.

¹⁴ “Châhrasala ahyma châ na ta, ei chyhsa zy chhao he ahyma châ ei ta, he hawhpa zy aly ngaitapa eima vaw hlâ thei tly? Hmo zydua he nâ tawhta a puapa châ ta, na eih cha eima cha vaw pie heihpa dei châ tlôh ta.

¹⁵ Eima mahpaw zy hawhna khata keimo la na hmiakô liana heta khichhaipa chyhsa hnohta khih a sa hrapa hawhpa dei châ pi ta; leilô liata hro chhôh nohzy cha nohpahlipa hawhta dei châ ta, hnabeisei awpa rai y vei.

¹⁶ Hy ABEIPA, eima Khazohpa y, na moh pathaihpa chata o eima cha sapa awpa he hmo eimâ chhuahnohna zydua he nâma ku tawhta a puapa châ ta, na eih sai a châ na.

¹⁷ Eima Khazohpa y, nâma ta pathipalôh zy pasia tyh chita, siana zy nâ ly tyh tahpa ei pahno hra; keima la palôhrupa hmeihseihpa ta he hmo zydua he aly ngaitapa ta a vaw hlâ nahta, he liata na chyhsa zy chhao aly ngaitapa ta nâ lâta a vaw hlâtuhpa ei hmô nahta ei ly ngaita.

¹⁸ Hy ABEIPA, eima mahpaw Abaraha zy, Aisika zy, Izarel zy Khazohpa y, na chyhsa zy ta he hawhpa palôhrupa ama phaoh lymâ thei nawpa ta ama palôhrupa zy he na châta pa-i la.

¹⁹ Chatawhcha ei sawchapawpa Sawlawmaw he, na biepiepa zy, na bie pahnosapa zy, na ryhpa zy angiahpa ta cha zydua tao awpa nata ei chhuahnoh hawpa o rôhnahpa sa awpa heta palôhrupa pha pakipa paphaosa mah y,” tah ta.

²⁰ Davi ta zawpi zydua hnohna chata, “ABEIPA nama Khazohpa cha reithai teh u,” tah ta. Chatanachata zawpi zydua chata ABEIPA ama mahpaw zy Khazohpa cha reithai ei ta, a bôh ei ta, ABEIPA nata abei cha anaoh ei ta.

²¹ Chatawhcha a mylâ chata ABEIPA lâta atheih nawpa nata ABEIPA lâta raopa hlâna hlâ nawpa ta viahchao tôhpa sâh kha nata mietahkupa tôhpa sâh kha nata mietahkupa taw sâh kha, ama dopa hlâna zy chhaota Izarel sahlao zydua chata atheihna hluhpi hlâ ei ta;

²² cha noh liana chata ABEIPA hmiakô liata thapha ngaitapa ta nie ei ta, doh chyu ei ta,

²³ Chatanachata Sawlawmaw cha ABEIPA abeidyuchhai liana chata a paw Davi vyuhpa ta abei ta a tyuh ta; thlaochhi ngaitapa ta y ta, Izarel sahlao zydua ta a rei a ngiah ei ta,

²⁴ hyutuhpa zydua nata chyhsa thatlôpa riahphapa zy nata Abei Davi sawchapawpa hropa zydua cha Abei Sawlawmaw liana chata a ngiarih ei ta.

²⁵ ABEIPA ta Sawlawmaw cha Izarel sahlao zydua mohmô liata thata parôhnahsa ta, Izarel râh liata a hmia lâta abeizy hry liata ahyhmah ama to beih leipa abei châna rôhnah ngaitapa patosa ta.

²⁶ Zese sawchapawpa Davi cha Izarel sahlao zydua chô liata a bei ta.

²⁷ Izarel sahlao chô liata a bei chhôh cha kô sypalih nata kô thôh a bei ta.

²⁸ Chatawhcha machâ ngaitapa, pawpi ngâsâpa ta hroh ta, hneirôh ngaitapa nata palyupalihna topa ta thi ta; a sawchapawpa Sawlawmaw cha ano vyuhpa ta a bei ta.

²⁹ Chatawhcha Abei Davi thâtih cha a thaona tawhta a chhâna taihta hrohsopa Samuel châbu liata zy, hrohsopa Natha châbu liata zy, hrohsopa Kada châbu liata zy ropa ta y ta;

³⁰ abeina kyh zy a hmotaothei zie zydua zy, ano nata Izarel sahlao chô nata râh zydua chô liata hmo yzie zy chhaota.