1 Pity第1章

¹ Pity. Zisu Krista apôstôl chata-Pawntu râh zy, Kalatia râh zy, Kapadôkia râh zy, Asia râh zy, Bithunia râhzy liata a paipatlapa sahlao a ypa.

² Paw Khazohpa ta a chhaichhi châta a tlypa, Thlahpa ta pathaisapa nata Zisu Krista angiapâta a thisaih ta a pathaisapazy hnohna chata: Nama chô liata ngiachhiena nata adyhna papôhsapata y mawh sy.

³ Eima Beipa Zisu Krista nata Paw cha reithaipata y mawh sy! Ano chata a ngiachhiena hluh ngaitapa lymâ hawhta athihpa hry tawhta Zisu Krista thyuheina hrohpa hmô awpata maniah sa heih ta,

⁴ ryuto rao thei leipa, a puapa a hlao leipa, alo thei leipa, avâ liata nama châta akhaihpa cha hmô nawpata,

⁵ pachhana deita hnôh lâta a lâ awpa, amâ chiehpa cha hmô awpata ngiapâna vâta Khazohpa hmotaotheina liata vaipa cha nama châ.

⁶ Cha liana chata thata nama tha a pha, atahmâ a byuh khiahtala reipasaona to vâta pachârôh chy hra ula,

⁷ namâ ngiapâna pasiana, ngôh mei liata pasia tawh chhaota, a leidia tyhpa hlâta a sôh viapa cha Zisu Krista a luah daihtina chata reithaina nata palyupalihna nata rônahna awpa a vaw châ thei nawpata.

⁸ Ano cha hmô beih leipa chhaota kyh pachâ ei ta; ano cha atahmâ hmô hra vei ula, a ngiapâ eichi ta, alyna reih hlei thei leipa nata rônah ngaitapata namâ ly ngaita kaw tyh.

⁹ Namâ ngiapâna chhâpa nama thlahpa pachhana cha hmôpata.

¹⁰ Nama chô liata ngiachhiena a vaw tlô awpa bie chhochhielietuhpa hrohsopazy ta, Krista Thlahpa âmo liata a ypa chata

¹¹ Krista pasa taona awpazy nata cha tawhta rônahna a y awpazy nata cha a pahno chhielie nozy khata, khâpa daihti e a châ, kheihawhpa daihti e cha ta a pahnosa ty tahpa a laichadai a chhuapata, cha pachhana thâtih cha tlua ei ta, liahsa amâ laichadai tyh.

¹² Cha hmozy chata âmosasy a chakao leipata, nâmo tlao ama cha chakao tahpa ama hnohta pahnosapa a châ haw, cha kyhzy cha avâ tawhta tuapa Thlahpa Pathaihpa baona ta Thâtihpha cha chhotuhpa khata atahmâ cha chho ei ta, cha hmozy cha vâlyuhchâpazy ta ama sai khoh tyh.

¹³ Chavâta nama palôhrupa chai a saipata a hrohrua ula, Zisu Krista a luah tita ngiachhiena a cha vaw cheipa awpa ei châ hnabeisei ngaitapata y lymâ teh u.

¹⁴ Saw dopazy hawhta ypata nama pahno vei nota, hlâno ta aohraonazy hawhta y leipata,

¹⁵ châ awtuhpa ei cha a pathaihpa hawhta nâmo chhao nama yzie zydua liata a pathaihpata tlao y teh u;

¹⁶ “Nâmo nama pathaih awpa a châ, kei pathaih tlôh na ta,” tahpa ropa a châpa kha.

¹⁷ Chatawhcha thlei hlei hnei leipata chyhsa to raihriapa chyu hawhta a pachiah tyhtuhpa cha Paw hawhta nama pado khiahta cha, he alei liata nama y chhôh cha chipata y teh u,

¹⁸ nama pathlatuhpazy pie pachhuahpa nama yzie khâpahrao leipa tawhtapa cha hmo a rao theipa tâkâ nata ngôh ta chatlaipa châ leipa eichi ta.

¹⁹ mietahkupa taw seina a hnei leipa nata a puapa a bai leipa thisaih hawhta, Krista thisaih sôhpa chata chatlaipa nama châ tahpa pahno tlôh eichi ta.

²⁰ Ano cha aleilô y hlâta raochhieliepata y tlai ta, châhrasala daihti hnôh lâzy liana chata nâmo vâta aluahpata y ta.

²¹ Ano vâta athihpa hry tawhta a pathyutuhpa nata a rônahna a pietuhpa Khazohpa cha angiapâtuhpazy châ eichi ta, namâ ngiapâna nata namâ hnabeiseina cha Khazohpa liata a y thei nawpata.

²² Unawhzy kyhpachâ hmeiseih awpata bie hmeiseihpa zyhpata nama thlahpa nama pathaisa hawpa vâta, pathipalôh ta phahnai khoh ngaitapata kyh a pachâ rairieh teh u.

²³ Chi a rao theipa liatahpa châ leipata. Khazohpa bie a hroh thlâh hapa nata a y thlâh hapa liana chata chi a rao thei leipa liata a pihpathipa tlao châ tlôh eichi ta.

²⁴ Khazohpa châ bie ta:“Chyhsa zydua sibiepa hawhta châ ei ta, ama rônahna zydua chhao sibiepapaw hawhta a châ. Sibiepa cha uah ta, a paw cha zô ta.

²⁵ Abeipa bie deikua cha chhâzaw ta a y thlâh haw,” tahpa châ tlôh ta. Cha cha Thâtihpha bie ama cha chhopa cha a châ.;