1 Timawthy第1章

¹ Pawla, Krista Zisu apôstôl, Khazohpa eima Pachhatuhpa nata Krista Zisu eima hnabeiseina ta raopa chata—

² Ngiapâna liata ei sawchapaw hmeiseihpa Timawthy hnohta: Paw Khazohpa nata Krista Zisu eima Beipa tawhtapa ngiachhiena zy, zawngiahna zy, adyhna zy nama hnohta y mawh sy.

³ Pachuna nanopa rai ama cha pachu lei nawpa nata phôhpa thlâthlipa nata laichadai tiah leipa pathlatuhpazy kyh, cha chata ngiapâna liata Khazohpa pachunazie a ypa he paphahnaisapa hlâta a eina tlao a tao tyh,

⁴ ama pachâ lei nawpata chyhsa thokhazy kha na chhorei thei nawpa ta Masidônia râh lâ ei sie chyta Ephesi khih liata y thlâh ha awpata ei châ hawpa hawhna khata atahmâ chhao kha ei châ haw;

⁵ châhrasala chhoreina chhâpa cha pathipalôh pathaihpa nata ngiaryna ryh leina pathaihpa nata ngiapâna hmeiseihpa tawhta a vaw puapa kyhpachâna cha ama hnei thei nawpata a châ.

⁶ Chyhsa thokhazy ama paviapa vâta cha cha tleisai ei ta, bie hrao leipa reina lâta sie haw ei ta,

⁷ ama bie rei yzie nata a ipata ama bie chhopa thâtih cha pahno tlôh leipata, Ryhpa pachutuhpazy châ awpata ama khoh tyh.

⁸ Ryhpa cha a pha tahpa pahno tlôh pi, chyhsa ta a phapata a hmâh khiahtala,

⁹ hezy he pahno ei sala, ryhpa he chyhsa siapa châta taopa châ leipata, ryhpa a papeisa leipa sahlao nata ryhpa a paraotuhpa sahlao châta zy, Khazohpa a pachâ leipa sahlao nata moleipa sahlao châta zy, mopathaih leipa sahlao nata Khazohpa a za leipa sahlao châta zy, pawzy a thietuhpa sahlao nata nôzy a thietuhpa sahlao châta zy, chyhsa a thietuhpa sahlao châta,

¹⁰ apheihmâhpa sahlao châta zy, chaohaopa sahlao châta zy, chyhsa paruhmâhpa sahlao châta zy, haithaipa sahlao châta zy, chhiesa pakheipa sahlao châta zy nata

¹¹ reithai tlâh Khazohpa Thâtihpha rônahpa pachuna dopa kei liata pavaosapa hawhpa châ leipata kyh hropa rai a ypa maih châta chhao taopa tlao a châ.

¹² Tha na patlôtuhpa Krista Zisu eima Beipa liana chata alynabie ei reih, eikhano ta reipachhietuhpa nata taolatuhpa nata pasipasawtuhpa châ haw hra sala;

¹³ ngâchhihpa ta na pachâ ta, ano chakaotuhpa ta eina rao hawpa vâna heta; châhrasala ngiapâ leina chôta pahno leipata a taopa ei châpa vâta, zawngiahna ei hmô;

¹⁴ chatawhcha eima Beipa ngiachhiena cha. ngiapâna nata Krista Zisu liata kyhpachâna ta thata a bie pakhô haw.

¹⁵ Krista Zisu moleipazy pachha awpata khizaw liata a vy tahpa he ngâchhihpa nata a pyh tlâh ngaitapa a châ. Ama hry liata molei chaipa ei châ hih;

¹⁶ châhrasala he vâna heta zawngiahna ei hmô, Zisu Krista chata molei chaipa keima liana heta a nôphanazie zydua a paluahsa thei nawpata, atahmâ tawhta chhâzaw hrona hmô awpata, ano a ngiapâtuh awpazy pahmô nawpata.

¹⁷ Abeichaipa chhâzaw ta a ypa, a rao thei leipa, hmô thei leipa. Khazohpa hmeiseihpa deita cha, chhâzaw ta palyupalihpa nata rônahpata y mawh sy. Amen.

¹⁸ Ei saw Timawthy y, eikhano ta na thâtih ama chhochhieliepa biezy hawhna khata, cha chhoreina bie cha ei cha pavaosa, chazy chata adyuhna phapa cha na dyuh thei nawpata,

¹⁹ ngiapâna nata ngiaryna ryh leina pathaih ngaitapa khâchâ a pyhpata. Chyhsa thokhazy ta chazy cha thy pathlapata ngiapâna kyh liana chata balyh raopa hawhta rao haw ei ta,

²⁰ chazy hry liana chata Humenia nata Alezanda châ ei ta, Khazohpa reipachhiena ama pachuna ama bâh thei nawpata âmo cha Sâtâ ei pie.;