2 Pity第3章

¹ Kho ngaitapa saih u, atahmâ nama hnohta ei ropa he ei châ paphaopa mianona châ ta, chazy chata cha pahnokhei awpa ei ta, nama palôhrupa pathaihpa pahra rairieh na ta;

² hrohso pathaihpazy bie reichhieliepa nata nama lyuhchâpazy pakah ta Abeipa nata Pachhatuhpa biepiepa cha nama thei thlâh hana awpata.

³ He he pahno tua ula, noh hnôh lâzy liana chata pahneisaotuhpazy cha âmo khonazie hawhta ypata pahneisaona chôta a vy aw ei ta,

⁴ “A vy heihna bietai cha khataihta e? Tao pathao tua no tawhta ato a y tyhpa hawhta chi pathlatuhpazy a mô no tawhna khata a y lymâ mâ tâh,” ama tah aw.

⁵ Hezy he pahno lei a pachâ raruah tyh ei ta, Khazohpa bie ta hlâno ta avâzy vaw y ta, alei chhao ti tawhtapa nata ti ta padopata vaw y ta,

⁶ chazy liana chata cha no ta khizaw a ypa cha ti ta vao ta, a leidia haw, tahpa hih.

⁷ Châhrasala atahmâ avâzy nata alei a ypazy he cha bie vâna chata Khazohpa pachâ leipa chyhsazy pachiapa nata leidia noh châta pakheipata, mei châta pachôpa a châ haw.

⁸ Châhrasala kho ngaitapa saih u, he bie kawh kha he my khah u, Abeipa pachâ ta cha noh kha he kô sâh kha hawhta châ ta, kô sâh kha chhao noh kha hawhta a châ, tahpa hih.

⁹ Chyhsa thokha ta nainôsôpata ama raopa hawhta Abeipa cha a bietai kyh liana chata a nainôsô vei, ahyhma ta ama leidiapa khoh leipata, ama moleina siesaipata ano lâ tlao ama vaw thei nawpata a nohphapa tlao a châ.

¹⁰ Chata hrasala Abeipa Noh cha parutuhpa hawhta a vaw tlô tlai aw, cha noh liana chata avâzy cha thata paropata leidia aw ta, hmo thabypazy cha mei ta patlôpata y ha aw ta, alei nata a chhôh liata a ypa zydua a kâ patlô aw.

¹¹ Cha hmozy cha cha hawhta leidia khai awpa a châ tahpa nama pahnopa vâta, Khazohpa Noh vaw tlôna daihti awpa cha hnabeiseipa nata phahnai khoh ngaitapata khopata yzie pathaihpa nata Khazohpa pachâna kyh liana chata kheihawhpa e nama châ aw tly?

¹² Cha Noh a vaw tlôpa vâta avâzy kâpata leidia aw ta, hmo thabypazy chhao cha mei ta pazaopata a y ha aw!

¹³ Châhrasala a bietaipa hawhna chata avâ thiehpa zy nata alei thiehpa, a chhôh liata siana a ypazy cha eima hnabei a sei.

¹⁴ Chavâta kho ngaitapa saih u, cha hawhpa hmozy cha nama hnabei a seihpa vâta, a puapa a bai leipa nata seina hnei leipata, thlalôh ngaitapata nama ypa a cha hmô thei nawpa ei ta, tiama papua teh u.

¹⁵ Chatawhcha eima Beipa nôphanazie cha pachhana daihti rypaona châta rao teh u. Eima unawhpa kho ngaitapa Pawla chhaota a hnohta sona piepa lymâ hawhta nâmo lâta a ropa hawhna khata,

¹⁶ a châ paphaopa zydua liana chata cha biezy cha reipata cha hawhna hra chata a roh. Chazy liana cha bie pahno ru ngaitapazy y ta, chazy cha chyhsa so leipa nata chyhsa a i leipazy ta Khazohpa cha bie hropa ama pachâ pasipa hawhta pachâ pasi ei ta, âmosasy ta ama pahleipadiapa tyh.

¹⁷ Chavâta kho ngaitapa saih u, nâmo ta cha biezy cha nama vaw pahno chhieliepa vâta a chado teh u, chata leipata la moleipazy a do leina liata chhihthapata namâ duana pha nota nama pao pathlei aw na.

¹⁸ Anodeikuacha eima Beipa nata Pachhatuhpa Zisu Krista ngiachhiena nata pahnona liana chata vaw laiseih teh u. Atahmâ nata chhâzaw taihta ano hnohna chata rônahna y mawh sy. Amen.;