2 Timawthy第1章

¹ Pawla, Krista Zisu liata hrona a ypa taina bie chhona kyh liata Khazohpa khonazie ta Krista Zisu apôstôl chata—

² Ei saw kho ngaitapa Timawthy hnohta: Khazohpa eima paw nata Krista Zisu eima Beipa tawhtapa ngiachhiena zy, zawngiahna zy, adyhna zy vaw y mawh sy.

³ Alyna biepata ei y thei nawpata, hmô cha khoh ngaita na ta, na mothlih pahno thlâhpata a chhô zâ ta bâh leipata ei thlahchhânazy liana chata ei cha pahnokhei tyhpa vâta Khazohpa lâta alynabie ei reih,

⁴ na pathlatuhpazy tawhta, ngiaryna ryh leina pathaih ngaitapa hneipata ei chakao tyhpa liana chata.

⁵ Ngiapâna hmeiseihpa nâma liata a ypa cha pahno thlâh ha tlôh na ta, cha ngiapâna cha a hmiatuata na mahnô Loi liana chata y ta, na nô Eunisi liana chata y hra ta, nâma liata chhao a y tahpa a dopata ei pahno.

⁶ Chavâta ei ku pahniepa vâta Khazohpa hmopiepa nâma liata a ypa kha pa-ia awpata ei cha pahnokhei;

⁷ Khazohpa ta china Thlahpa maniah pie leipata, hmotaotheina nata kyhpachâna ta nata palôhrupa sia ngaitapa hneina Thlahpa tlao maniah pie tlôh ta,

⁸ Chatanachata eima Beipa bie pahnosana cha zakhei leipa la, kei ano vâta atâhpa chhao na he na zakhei hra kha y, Thâtihpha vâta rietheipa he Khazohpa hmotaotheinazie hawhta pasa tlao na tao khei mah y,

⁹ ano chata eima hmotaopazy hawhta châ leipata, ano raopa nata ngiachhiena hawhta maniah pachha ta, awna pathaihpata maniah aw hra ta, cha ngiachhiena cha aleilô y hlâta Krista Zisu liana chata maniah a pie haw.

¹⁰ Châhrasala maniah Pachhatuhpa Krista aluahna vâna heta atahmâ paluahsapata a y haw, ano chata thina pahleipadiapata Thâtihpha lâ hrona nata leidia thei leina a paluahsa haw.

¹¹ Cha Thâtihpha bie cha pahnosa awpata tlâh-awhkheituhpa nata apôstôl nata achutuhpa ta raopa ei châ,

¹² cha vâna chata he hmozy chhao he pasa ei tao. Châhrasala ei no za vei, ei ngiapâna cha ei pahno, a hnohta ei pavaosapa cha, cha noh châna chata a vao thei tahpa a dopata ei pahno hra.

¹³ Krista Zisu liata a ypa ngiapâna nata kyhpachâna hneipata biedopa yzie ei pakah tawhta na theipazy kha khâchâ zi teh;

¹⁴ hmophapa na hnohta pavaosapata a ypa kha nama chhôh liata Thlahpa Pathaihpa a ypa heta a phapata a vao teh.

¹⁵ Asia râh liata a ypa zydua ta einâ heisai haw ei tahpa pahno chi ta, ama hry liana chata Phukela nata Hamôkene amâ hlao.

¹⁶ Abeipa chata Ônesiphôra chhôhkhazy hnohta zawngiahna pie mawh sy, ano chata khâ na palysa ta; ei bâlia a kypa chhao na zakhei tlôh lei khâh ta,

¹⁷ Rawma khih liata a y nona khata pakhâtata tlao eina tlua.

¹⁸ cha Noh liana chata Abeipa lâta zawngiahna hmô awpata Abeipa chata ano cha rao mawh sy. Ephesi khih liata thata a chakaonazie kha na pahno kaw.;