Hmotaopazy第1章

¹ Hy Theôphila y: Hmia lâta cha liana khata Zisu hmotaopa nata pachuna, a pathaona zydua kha ei roh,

² Thlahpa Pathaihpa baopa ta a apôstôlzy a tlypa hnohta bie a taih khai nahta avâ lâ chhihthapa taay hana noh kyh taihta.

³ A thi tawhta noh sypalih po tlai ama hnohta aluahpa ta, a hroh ha heih tahpa pasia nawpa ta kyh hluhpi ta a palâsa ta, Khazohpa Khihnarâh thâtih a reih tyh.

⁴ Hmaokha ta ama ypa a pahlao hra ta, “Zerusale siesai khah u, Paw bietaipa ei reipa nama theipa kha vaw hâ thlâh ha teh u,” khâchâ tah ta.

⁵ “Zawhana khata ti ta bâti tyh ta, châhrasala bohpi leipa ta Thlahpa Pathaihpa ta bâtipa nama châ aw,” tah ta.

⁶ Chatanachata ama vaw pakhy nahta, âmo ta a hnohta, “Abeipa, atahmâ he ma Izarelzy hnohta Khihnarâh na padua pathi heih aw?” tahpa ta hiahri ei ta.

⁷ Ano chata ama hnohta, “Paw ta a daihti nata a noh, ano reisai ta y awpa ta a raopa cha nâmo pahno awpa châ vei.

⁸ Châhrasala Thlahpa Pathaihpa cha nama chôta a vaw tlô tita, hmotaotheina nama hnei aw; chatanachata Zerusale liata zy, Zudia râh nata Samari râh khi to liata zy, kaokih taih chhaota ei bie pahnotuhpazy nama châ aw,” tah ta.

⁹ Cha biezy cha a rei khai nahta, ama hmô thlâh hana chôta, avâ lâ chhihthapa ta y ta, ameih ta ama hmô khao leina taihta a chhi ha ta.

¹⁰ Avâ lâ a kiapa ama mo thlâh ha nota, chyhsa pano poh ngyuhpa a bupa ta ama kiapâh liata a vaw duah ei ta,

¹¹ cha chyhsazy chata, “Kalili râh mo saih u, khazia avâ lâ mopa ta namâ duah thlâh haw? He Zisu, nâmo tawhtapa avâ lâ a chhipa ta a ypa he, avâ lâ a kiapa nama hmôpa hawhna hra heta ano tlai he a vy heih aw,” tah ei ta.

¹² Chatawhcha Ôli tlâh ama tahpa tawhta Zerusale lâ kua heih ei ta, cha tlâh cha Zerusale kiapâh châ ta, pahânoh siena rakha châ ta;

¹³ amâ ngia nahta, ama yna chhôhpadâhpa chô chaipa lâna chata kiah ei ta, Pity nata Zawhana zy, Zami nata Adru zy, Phili nata Thawma zy, Bathawlawmu nata Mathai zy, Alphu sawchapawpa Zami nata Saimaw Zelôte py liatahpa nata Zami sawchapawpa Zuda chhao ama châ.

¹⁴ Cha sahlao zydua cha chanô ahyzy tlyma nata Zisu nô Mari zy, Zisu unawhpazy chhaota, palôhrupa miakha ta phahnai khoh ngaitapa ta thlahchhâpa ta y thlâh ha ei ta.

¹⁵ Cha nohzy liana chata unawhzy hry liata Pity a duah ta ama zydua ta za kha nata syno rachhôh châ ei ta,

¹⁶ “Unawh saih u, Thlahpa Pathaihpa ta Davi pakah ta Zisu patu tuhpazy a chhithatuhpa Zuda kyh a rei chhieliepa kha, Khazohpa châ bie kha a vaw tlô awpa raina a châ.

¹⁷ Ano cha eima hry liata rei pâpa châ ta, he chakaonazy liana heta tovyuh chhao hnei tlôh hra ta.

¹⁸ (Cha chyhsa chata a moleina ty ta, su miakha chalei ta; â khu lâta pao ta, a lialiah liata a patlaw ta, a rih zydua pua khai ha ta.

¹⁹ Cha kyh cha Zerusale liata a ypa zydua ta vaw pahno ei ta, chatanachata cha su cha âmo reih ta ‘Akeldama’ tah ei ta, cha cha, ‘Thisaih Su’ tahna a châ.

²⁰ Hlazy Châbu liata he biezy he ropa a châ, ‘A yna rory pahrasapa ta y mawh sy, a chhôh liata ahyhma y kha se,’ tahpa nata ‘Hyutuhpa a châna cha mo hropa ta to mawh sy,’ tahpa hih.

²¹ Chatanachata Abeipa Zisu eima hryta a ngia tyh, pua tyh tahpa ta a y chhôh zydua ta, 22 Zawhana bâti rakha tawhta keimo tawhtapa avâ lâ a chhipa ta a y noh taihna khata, he maniah a hlao tyhpazy hry liana heta, chyhsa pakha a thyuheina maniah a pahnokheituhpa châta a y awpa a châ,” tah ta.

²³ Chatawhcha chyhsa pano rao ei ta, Zawsi Basaba ama tahpa cha, a moh hropa Zusta ama tahpa nata Mathia châ ei ta.

²⁴ Thlahchhâ ei ta, “Nâ, Abeipa, chyhsa zydua palôhrupa a pahnotuhpa, Zuda chata ano yna liata sie awpa ta

²⁵ he chakaona nata apôstôl rai a siesaina he a vyuhpa ta y awpa ta he chyhsa pano he a kheihawhpa he ma nâ tlyh maniah pahnosa mah y,” tah ei ta.

²⁶ Cha khai tawhta pachao ei ta, ama pachaona liana chata Mathia chôta tlu ta; chatanachata ano cha apôstôlzy pahrawhleikhazy hry liana chata rei pâpa châ ta.;