Kaolaosa mozy第2章

¹ Nâmo nata Laodisi khih liata a ypazy nata sapa liata hmia ei hmô leipa maih chata, kha tlu rimâ ta ma nama châta ei tei lyliah tahpa he nama pahno awpa khoh tlôh na ta,"

² chatanachata Khazohpa bienyupa sona nata novâhna ryu zydua nyuna Krista cha ama pahno thei nawpata, pahnopata khâchâ ngiapâna hneirôna zydua cha to awpata,

³ a kyhpachâna liata a chahry pabaohpata ama pathipalôhzy cha thlalôhpata a y thei aw.

⁴ Ahyhma ta reikah thaipa ta ama cha dô lei nawpata chazy cha ei tah.

⁵ Sapa ta nama hnohta y vei hra aw sala, aly ngaitapata ypata nama siazie nata Krista namâ ngiapâna a yzie mopata, thlahpa liana chata nama hnohta y tlôh na ta.

⁶ Chavâta Krista Zisu Abeipa cha namâ lypa hawhna khata ano liata thari thlapa nata

⁷ a paryh rilipata ypata pachupata nama ypa hawhna khata, namâ ngiapâna liana chata â i ngaitapata ypata, alyna bie hluhpi reipata ano liana chata y teh u.

⁸ A chado teh u, chata leipata la ahyrai ta Krista bie hawhta châ leipata, chyhsapa bie ryuhipa nata khizaw yzie hawhta, ama bie sopa nata dona khâpahrao leipata a châ chhi pathlei aw ei na.

⁹ Ano liana chata Khazohpa pakina to cha pôhpa hneipata y thlâh ha tlôh ta;

¹⁰ ano liana chata paki haw hra eichi ta, ano cha abeina nata biehneina zydua luhpa a châ.

¹¹ Krista chopawtaina liana chata sapa pôhpa pahluh khaipata, ano liana chata ku ta chopawtaipa châ leipata, chopawtaipa nama châpa kha;

¹² bâtina liana chata ano hnohta pabupa vaw châ haw hra tlôh eichi ta, cha liana chata athihpa hry tawhtapa ano a pathyutuhpa Khazohpa raihria ngiapâpa vâta ano hnohta pathyupa nama châ hrapa kha.

¹³ Chatawhcha nâmo nama paraonazy nata nama sapa liata chopawtai leina vâta a thipa châ eichi ta, nâmo tlai cha ano nata a cha pahropa ei kha, eima paraona zydua maniah a ngiahthai ta,

¹⁴ a bana cha biepipata ropa eima chôta a ypa maniah dyu tyhpa cha pahlei haw tlôh ta; cha tlai cha la haw ta, kraws liata khaipâpa ta.

¹⁵ Chatawhcha abeina nata biehneinazy cha pahluhpata, cha kraws liana chata chazy cha tiapata alâhâh ta pahnosa nawpata hmâh haw ta.

¹⁶ Chatanachata nie kyh ta tlyma, do kyh ta tlyma, kyhchhi noh kyh ta tlyma, thla thiehpa kyh ta tlyma, pahânoh kyh ta tlyma ahyhma ta cha sei kha ei se.

¹⁷ Chazy cha hmo a vaw tlô awpazy nohpahlipa a châ, a hmeiseihpa deikua cha Krista a châ.

¹⁸ Ahyhma ta âmo reisai ta reisina vâta vâlyuhchâpa achhyna hmâpata nama lymâ cha cha chhu kha ei se, ama hmo hmôpazy liana chata y thlâh hapata, ama sapa lâ palôhrupa vâta apalaipata,

¹⁹ luhpa cha khâchâ patu tlôh leipata ama y, ano zawhzi ta pôhpa tlokhuh cha a pazaona nata chahrynazy vâta pasapa nata a pazao pakhypata Khazohpa laiseihna ta laiseih tyh ta.

²⁰ Khizaw hrona yzie cha Krista hnohta na thisai haw khiahtala, khazia khizaw liata a hrohpa hawhta chyhsapazy bietaipa nata

²¹ pachuna hria khao leipa la, pachâ khao leipa la, hria rai hria khâ tahpa hawhta

²² biepiepazy liana heta nama ngiarih tly? Cha hawhpa hmo zydua cha hmâna chôta a leidia awpa a châ.

²³ Cha hawhpa hmozy cha ama khopa hawhta achhypa nata reisipa nata sapa a pasâhsapa liana chata, tao awpa hawhta a lâ tlai ta; châhrasala sapa khopa zyhna pakhâpa kyh liana chata khâpahma phahnai hlei vei.;