Ephesi mozy第6章

¹ Sawnawh saih u, Abeipa liana chata nama nô nata nama pawzy bie zyh teh u, cha cha hmo dopa châ tlôh ta.

² “Na nô nata na paw palyupalih teh,” cha cha biepiepa bietai a hnei tua chaipa a châ,

³ “Chatanachata na châta pha aw ta, alei liana heta na hro a pareih hra aw.

⁴ Nâmo pawzy saih u, nama sawzy ru pachhô khah u, Abeipa chhoreina liata nata pachuna liana chata tlao mohôh teh u.

⁵ Sei saih u, Krista bie a ngiapa hawhta chipa nata a chalyupata pathipalôh miakha phaohpata.

⁶ chyhsapa a palysatuhpa hawhta dei, mokhaoh ta chakao leipata, Krista sei hawhta pathipalôh ta Khazohpa khopa tlao taopata,

⁷ chyhsapa chakaopa hawhta dei châ leipata, Abeipa chakaopa hawhta kho ngaitana chôta chakaopata.

⁸ Sei rai châ sala, sei châ leipa rai châ sala, chyhsa to ta hmophapa ama taopa maih cha Abeipa tawhta a ualuapata ama hmô heih aw tahpa pahnopata sapa liata nama hyutuhpazy bie a ngiah teh u.

⁹ Nâmo hyutuhpa saih u, cha hawhna hra chata âmo nata nâmo hyutuhpa cha avâ liata a y tahpa nata ano chata chyhsa khokheipa hlei hnei vei tahpa pahnopata, pachhipary leipata ama chô liata tao hra teh u.

¹⁰ A chhâ chaina ta cha, Abeipa liata nata a thatlôna liana chata hmotaotheina hneipata y teh u.

¹¹ Ahripa reipasaonazy cha namâ dyuh thei nawpata Khazohpa adyuhna chhaichhi pakipata a tobi teh u.

¹² Eimâ piapazy he sapa nata thisaih châ tlôh lei khâh ei ta, abeinazy nata biehneinazy nata he zohna chô liata khizaw ryureituhpazy nata avâ suzy liata thlahpa moleipa sahlao a ypazy tlao ama châ.

¹³ Chavâta noh pha leipa liana chata namâ dyuh thei nawpa nata nama tao khai tawh chhaota namâ duah thei nawpata, Khazohpa chariah chhaichhi pakipa cha la teh u.

¹⁴ Chatanachata nama chai cha bie hmeiseihpata a saipata, siana chachôhna vyhphao cha a kypata,

¹⁵ adyhna Thâtihpha a chhuahnohna cha nama phei liata a kypata a duah teh u;

¹⁶ cha leipa chhao cha ngiapâna vyhphao la ula, cha chata moleipa châtai a ia theipa zydua cha nama pachhai thei aw.

¹⁷ Chatawhcha pachhana lakhu nata Thlahpa zaozi, Khazohpa bie cha la ula.

¹⁸ Thlahchhâna nata hiana to ta khatino raita Thlahpa ta thlahchhâpata y teh u. Cha kyh liana chata mopathaihpa zydua châta phahnai khoh ngaitapa nata a haw chaimâhpata y teh u.

¹⁹ Thâtihpha bienyupa riahpha ngaitapata phuah awpata ei pakah âpata bie pareisapata ei y thei nawpata, kei châta chhao na hiapa teh u.

²⁰ Cha kyh liana chata ei reih awpa hawhpa cha riahpha ngaitapata ei reih thei nawpata, cha thâtihpha lyuhchâpa bâlia a kypa ei châ.

²¹ Nâmo chhaota kheihta ma ei y, ei thâtih nama pahno thei nawpata Tykiku Abeipa liata unawh kho ngaitapa nata chakaotuhpa ngâchhih ngaitapa heta ato a cha pahnosa aw ei.

²² He vâna tlai heta ano cha nâmo lâta ei vaw tuah, eima thâtih nama pahno theina awpa nata ano heta nama pathipalôh thlah a palôh thei nawpata.

²³ Paw Khazohpa nata Abeipa Zisu Krista tawhtapa adyhna nata ngiapâna a hlaopa kyhpachâna, unawhzy hnohna khata y mawh sy.

²⁴ Eima Beipa Zisu Krista dialeipata kyh a pachâtuhpa zydua hnohta ngiachhiena y mawh sy.;