Esthy第1章

¹ Abei Ahasuara a bei nota, cha Ahasuara cha India tawhta Ethiôpia taihta râh pachhaihpa za kha nata syno nata râh sari chôta a beipa châ ta; "2 Abei Ahasuara a râh beidyuchhai abei o Susa liata a tyuh no,"

³ a bei kô thô kô liana khata a molaipa zydua nata a chyhsazy châta kyhchhi tao ta, Persia nata Media râh liata biehneituhpa zy ama râh pachhaihpa chyhsa phapazy nata molaipazy cha y khai ei ta,

⁴ a râh rôhnah ngaitapa ryuzy nata a bei rôhnah ngaitanazie bopi, noh sycharie tlai pamosa ta.

⁵ Cha khai nahta molaipa nata mo chyhpa, abei o Susa liata a vaw hlaopa zydua chata abei o sahdô dôhpachhôh tlyhmia liata, abei ta noh sari tlai kyhchhi tao ta.

⁶ Poh a ngyupa zy, a hrohpa zy, nohsaihpâpa zy, pala rih dipa saihdôhpa ta, pataona tâkâri dyuchhaizy cha awhlôteihpa a saihpa zy, a râhpa zy, a maihpa zy, a vyhpa zy ta taopa chô liata patyuh ei ta.

⁷ Ngôh nyu ta kresawti rai ei ta, nyu cha chi nanopa alyu leipa sai a châ, abei kresawti hluh ngaita ta, abei hneinazie hawhta.

⁸ Chatawhcha kresawti cha ryhpa hawhta doh ei ta, ahyhmah ta pasaipa châ leipa ta, chyhsa tota ama khopa hawhta ama tao chyu nawpa ta abei chata a o liata hyutuhpa zydua cha chho ta.

⁹ Abeinô Vasti chhaota Ahasuara abei o liata chanô sahlao châta kyhchhi tao ta.

¹⁰ A noh sari nona chata abei cha kresawti ta a palôh palaisa ta, chhôhpadâhpa o vaihtuhpa pasari Abei Ahasuara hmiakô liata a chakaotuhpa Mehuma zy, Bizatha zy, Hôbôna zy, Bitha zy, Abatha zy, Zetha zy, Karka zy cha

¹¹ Abeinô Vasti a abei lakho a khona chôta zawpizy nata molaipazy a hmi phanazie pamosa awpa ta abeipa hmiakô lâta chhihtha awpa ta bie pie ta; a hmi pha ngaita tlôh ta.

¹² Châhrasala Abeinô Vasti chata chhôhpadâhpa a vaihtuhpazy ta vaw awpa ta abei biepiepa ama chhopa cha ei ha ta; chavâta abei cha a hie hâh ngaita ta, a pathi-ia ha ta.

¹³ Chatanachata abei chata hmo a pahnopa chyhsa, chyhsa sopa zy hnohna chata ryhpa nata ryureinazie a pahnopa zydua cha cha hawhna chata abeipa ta a tao tyhnazie rai châ ta,

¹⁴ ano a pazituhpazy cha Karahana zy, Shetha zy, Admatha zy, Tasi zy, Mere zy, Marseha zy, Memuka zy, Persia nata Media râh molaipa pasari, abei hmia a hmô tyhpa, khihnarâh liata ano a hnia chai tyhpa zy ama châ:

¹⁵ “Chhôhpadâhpa a vaihtuhpazy ta bie ama vaw tlôkheipa hawhta, Abeinô Vasti chata Abei Ahasuara biepiepazy cha zyh khoh tlôh leipa ta a chô liata ryhpa hawhta tao awpa ta kheihta e eima tao aw?” tah ta.

¹⁶ Memuka chata abei nata molaipazy hmiakô liana chata, “Vasti chata abei chô liata a paraopa dei châ leipa ta. Abei Ahasuara râh pachhaihpa zydua lâta pho to chô liata chhao a paraopa a châ.

¹⁷ He beinô hmotaopa he chanô zydua ta pahno aw ei ta, Abei Ahasuara chata Abeinô Vasti a hmiakô lâta a vaw chhi awpa ta bie pie ta, châhrasala vawh vei,’ tahpa a pathâh khiahtala ama vahpazy ama mohnao aw.

¹⁸ Atanoh tlai chhao heta, Persia nata Media molaipa chanô sahlao beinô hmotaopa a pahnopa zy heta abei molaipa zy chô liata tao hra aw ei ta, chatanachata amohnaona nata hiehâhna thata a pua aw.

¹⁹ Abei ta a pha a tahnazie a châ khiahtala, abei biepiepa pathâhsapa châ sala, Abeinô Vasti cha Abei Ahasuara hmiakô liata a vy khao cheita khah sy, tahpa bie he panano khao chacheita lei awpa ta Persia nata Media khihnarâh ryhpa hryta ropa châ sala; chatawhcha abei ta ano hlâta a pha viapa abeinô chanô patosa sala.

²⁰ Chatawhcha abei cha a khihnarâh zydua liata (kawh ngaita hra sala) pathâhsapa a châ tita cha molaipa nata mo chyhpa zy chhao, ama lahpinô zy ta ama vahpa zy ama za aw,” tah ta.

²¹ Cha bie chata abei nata molaipazy cha palysa kaw ta, chatanachata abei chata Memuka bie hawhna chata tao ta;

²² abei khihnarâh zydua liata, râh to liata âmo châ chyuta, pho to âmo reih chyu ta, chapaw ta ama o chhôh chyu liata bie ama hnei awpa a châ tahpa kyh a paphao haw.