Puasaina第1章

¹ Hezy he Zakaw hnohta Izi râh lâ ama chhôhkha chhaota a siepa Izarei sawchapawzy moh a châ.

² Chazy cha Rubena, Simeôna, Livai nata Zudâh;

³ Iskâra, Zebulawna nata Benzami;

⁴ Dânâ nata Nâthalai, Kâdâ nata Asera zy ama châ.

⁵ Zakaw pathla zydua cha manôh sysari châ ei ta, Zawsi deikua cha Izi râh liata a vaw y chhielie haw.

⁶ Zawsi nata a unawh zydua nata cha chhâ sahlao zydua cha thi ha ei ta.

⁷ Izarei sawzy cha chi hluhpi pathlapa ta, thata pôh ei ta. Pôh via rili ei ta, ama thatlô ngaita ta, Izi râh cha âmo sai ta bie thlâh ha ei ta.

⁸ Zawsi a pahno leipa, bei thiehpa Izi râh liata vaw pua ta.

⁹ A phopi hnohta, “Pachâ teh u, Izarei sawzy he keimo hlâta hluh viapa ta, ama tha chhao a tlô via ha bâ hih.

¹⁰ A vy teh u, so kawpa ta ama chô liata hmo tao ei suh u. Chataleipatala vaw pôh via lymâ aw ei ta, adyuhna vaw y mawh sala, eima chariahpazy a baipa ta, miah a dyuh aw ei ta, Izi râh tawhta ama pua pathlei aw na,” tah ta.

¹¹ Chavâta ama phao thata pahri ta, ama rie pathei awpa ta, raihria hyutuhpazy âmo châta rao ei ta. Pithô nata Râmese khihpizy cha Phiraoh châta Sawvâ khihpi ta padua ei ta.

¹² Châhrasala ama rie ama pathei via nahta, pôh via rilipa ta su to liata a hiepatla via rili ei ta. Chavâta Izi mo ta Izarei sawzy cha chihuh pathao ha ei ta.

¹³ Chatanachata Izi mo ta Izarei sawzy cha riethei ngaitapa ta rai ama pahriasa lymâ.

¹⁴ Raihria ru ngaitapa, alô khaipa nata alei raopa raizy nata lyu liata rai to pahriasapa ta ama hro rie thata pathei ei ta, ama raihria zydua liata riethei ngaitapa ta ama pahriasa lymâ.

¹⁵ Izi bei ta Hebrai nawhpaytuhpazy biepie ta, pakha moh cha Sipharâ châ ta, ahropa moh cha Puah a châ.

¹⁶ Izi bei ta ama hnohta, “Hebrai chanôzy nawh nama pay tita, nawh yna rakhô liata moh u la, sawchapaw a châ khiahta cha, thie aw ei chi ta, sawchanô a châ khiah deikua cha, pahlôh awpa a châ,” tah ta.

¹⁷ Châhrasala nawhpaytuhpazy cha Khazohpa a chipa ama châpa vâta, Izi bei biepiepa hawhta tao leipa ei ta, sawchapawzy chhao ama pahlôh lymâ.

¹⁸ Izi bei ta nawhpaytuhpazy cha aw ta, ama hnohta, “Khazia cha hawhpa hmozy cha tao ei chi ta, sawchapawzy nama pahlôh lymâ?” tah ta.

¹⁹ Nawhpaytuhpazy ta Phiraoh hnohta, “Hebrai chanôzy cha Izi chanôzy hawhta châ veih ei. Âmo cha ama nawh y naota ta, nawhpaytuhpazy ama tlô hlâta nawh amâ vaw chhaih hmâ ha tyh,” tah ei ta.

²⁰ Chavâta Khazohpa ta nawhpaytuhpazy cha phana ta mohôh ta. Izarei phopi cha pôh via lymâ ei ta ama thatlô via rili ta.

²¹ Nawhpaytuhpazy chhao Khazohpa a chipa ama châpa vâta, Khazohpa ta chhôhkhazy a paduapa hra ei.

²² Chatawcha Phiraoh ta a phopi zydua hnohta, “Hebrai sawchapaw a pihpa maih Nile chavah liata thy lymâ aw ei chi ta, sawchanô deikua nama pahlôh aw,” tahpa ta biepie ta.