Kalatia mozy第1章

¹ Pawla apôstôl - chyhsapa tuapa châ leipata, chyhsapa zawhzi chhaota châ leipa, Zisu Krista nata athihpa hry tawhta a pathyutuhpa Paw Khazohpa zawhzi ta tlao a châpa tawhta châ paphaopa cha a châ.

² Ei hnohta unawh a ypa zydua chhaota Kalatia râh liata awnanopa sahlaozy eimâ châ naoh:

³ Eima Paw Khazohpa nata Beipa Zisu Krista tawhtapa ngiachhiena nata adyhna nama hnohta y mawh sy.

⁴ Krista chata eima Khazohpa nata eima Paw khonazie hawhta, atahmâhlâ khizaw molei ngaitapa tawhna heta maniah a pachha thei nawpata eima molei vyuhpata anosasy ta a pie ta.

⁵ Khazohpa lâna chata rônahna chhâzaw ta y mawh sy! Amen.

⁶ Krista ngiachhiena zawhzi ta châ awtuhpa ei kha, cha hawhta sôkha ta thâtihpha nanopa lâta namâ heisaipa he ei no a âh kaw.

⁷ Cha cha thâtihpha châ hra tlôh va, nâmo patypamâpata Krista thâtihpha a panano khohpa ahyzy tlyma ama ypa châ ta.

⁸ Châhrasala keimo ta tlyma, avâ tawhta a zupa vâlyuhchâpa rai ta tlyma, thâtihpha eima cha chhopa leipa khata cha thâtihpha hropa cha vaw chho ei sala, chhiesapata y mawh sy.

⁹ Eikhano ta eima reipa hawhna khata, atahmâ ei reih heih aw, thâtihpha namâ pyhpa leipa khata cha thâtihpha hropa ahyrai ta cha chho ei sala, chhiesapata y mawh sy.

¹⁰ Cha khiahtala atahmâ he chyhsa ma ei reipasao, Khazohpa maw? A châ vei khiahtala chyhsapa ma palysa ei chhuah tly? Chyhsapa palysapata y aw sala, Krista sei châ aw va na.

¹¹ Unawh saih u, ei thâtihpha chhopa kha chyhsapa lâ kyh châ vei tahpa ei cha pahnosa ei.

¹² Chyhsapa tawhta a hmôpa châ hra va na, chyhsapa pachupa châ hra va na, Zisu Krista aluahna vâta a hmôpa tlao châ tlôh na ta.

¹³ Zuzy phôryhpa achhyna yzie liata cha eikhanota ei yzie cha pahno kaw tlôh eichi ta, kha tawhta Khazohpa awnanopa sahlao thata taolapata pahleipadiapata ei chhuahpa kha.

¹⁴ Na pathlahtuhpazy bie ryuhipa chôta phahnai ei khoh pachaipa vâta, Zuzy phôryhpa achhynazie kyh liana chata ei chiheihzy hry liata ei rihchâhkha a hluhpizy khoh na ta.

¹⁵ Châhrasala ei nô chhi tawhta na pananotuhpa nata a ngiachhiena vâta nâ awtuhpa Khazohpa chata,

¹⁶ Zenitaizy hry liata a Thâtihpha ei chho thei nawpata Sawchapawpa cha palôhtlâh ngaitapata keima liata a paluahsa nona khata ahyhmah ta a chhohia leipa na ta,

¹⁷ eima hmialâta apôstôl a châ hawpazy hnohta Zerusale khih lâ khy hra leipata, Arabia râh lâ tlao sie syulyu ha na ta, chatawhcha Damaska khih lâta kua heih na ta.

¹⁸ Kô thôh hnôh lâta Pity a hmô awpata Zerusale khih lâ khy na ta, ano hnohta noh hrawhleipangawh châh na ta.

¹⁹ Abeipa unawhpa Zami dei leipata cha apôstôl hropa ahyhma ta hmô leipa na ta.

²⁰ Nâmo lâta bie ei ropazy he Khazohpa mohmô liata chhao haih va na!

²¹ Cha hnôh lâna chata Suria nata Kilikia râh lâta a vy na ta.

²² Cha no chhaota Zudia râh awnanopa sahlao hry liata pahnopa châ mâh lei khâh na ta.

²³ “Eikhanota maniah taolatuhpa khata hmialâta ngiapâna kyh a parao tyhpa kha, atahmâ tlao a chhô haw,” tahpa chyhsa reipa deita thei ei ta.

²⁴ Chatawhcha keima vâta Khazohpa palyupalih haw ei ta.;