Kalatia mozy第6章

¹ Unawh saih u, chyhsa ta moleina kheihawhpa rai a tao nota pachhaipata y sala, a reisi ngaitapata padua teh u. Nâmo thlahpa chyhsazy saih u, reipasaopata nama y lei nawpata a vaih teh u.

² Nama phaohripazy cha a phaokhei rairieh teh u, chatanachata Krista ryhpa bie cha nama zyh pakipa a châ aw.

³ Chyhsa khâpahma châ tlôh leipata anosasy ta molaipa ta a pachâ khiahtala, anosasy ta adopa châ tlôh ta.

⁴ Chyhsa tota ama hmotaopa tlao pasia chyu ei se; cha tina chata mo hropa chôta châ leipata, âmosasy chô lia deita ta a palaikhei awpa a hnei aw.

⁵ Chyhsa to ta âmo phao chyu phaoh tlôh aw ei ta.

⁶ Chyhsa bie pachupata a ypa chata hmo phapa zydua ta pachutuhpa cha bao hra mawh sy.

⁷ Dôpata y khah u; Khazohpa cha mohnao awpa rih châ vei, chyhsa ta a hiepa maih, cha tlai cha hria tlôh aw ta.

⁸ Ano sapa lâta a hietuhpa chata sapa lâtahpa raona hria aw ta; Thlahpa lâta a hietuhpa deikua chata Thlahpa lâtahpa chhâzaw hrona a hria aw.

⁹ Chatanachata hmo phapa tao ai khah ei suh u, eima diathlâ leipa khiahtala, a daihti ta hria tlôh aw pi ta.

¹⁰ Chatanachata rypaohna daihti eima hneipazie lymâ hawhta, chyhsa zydua chôta hmo phapa tao ei suh u, ngiapâna chhôhkhazy hrytahpa chô liata tao pachai ei suh u.

¹¹ Keima ku tlaita nâmo lâta hawrawh pahreipapi ta ei ropa he moh teh u.

¹² Sapa liata ama hmia a papha khohpa maihta chopawtaipata y awpata ama cha pataosa tyh, khâpavâta hmah châ leipata, Krista kraws vâta taola ama tao lei nawpa deita a châ.

¹³ Chopawtaipazy tlai chhao chata ryhpa bie a ngiah tlôh leipa ei ta, nama pôhpa liata a palaikhei awpa ama hnei thei nawpata chopaw pataisa ama cha khoh.

¹⁴ Kei deikua chata eima Beipa Zisu Krista kraws leipata cha ei palaikhei lei awpazie cha, cha zawhzi na chata khizaw he kei châta khaipâpata a y haw, kei chhao khizaw châta khaipâpata ei y.

¹⁵ Taopathi heihna leipata cha chopawtaipa he khâpahma châ leipata, chopawtai leipa chhao khâpahma châ hra vei.

¹⁶ Cha ryhpa hawhta a ypa maih Khazohpa Izarel hmeiseihpazy chô liana chata adyhna nata ngiachhiena y mawh sy.

¹⁷ Atahmâ tawhna heta ahyhma ta na patypamâ khao khah se; ei pôhpa liana heta Zisu pahnosazy phaoh tlôh na ta.

¹⁸ Unawh saih u, Abeipa Zisu Krista ngiachhiena nama thlahpa hnohta y mawh sy. Amen.;