Hebrai mozy第1章

¹ Khazohpa, hlâno ta maniah pathlatuhpazy hnohta ei hluhpi nata kyh tota hrohsopazy ta bie a vaw reituhpa khata;

² he noh chhâna liana heta keimo hnohta a Sawchapawpa liana chata bie a reih haw. Khazohpa ta ano cha ato ryutotuhpa ta rao ta, ano zawhzi ta khizaw cha tao ta.

³ Sawchapawpa cha Khazohpa rônahna ta khaih ta. Khazohpa chhichâna a lyupa tlai cha ta, ano hmotaotheina bie ta ato patu ta. Moleinazy a pathai khai tawhta, chô lâta rônah chaipa chachâh lâna khita a kaw tyuh ta.

⁴ Sawchapawpa cha vâlyuhchâpazy hlâta moh pha viapa Khazohpa ta a patosapa hawh tlaita âmo hlâta rônah viapata vaw châ haw tlôh ta.

⁵ Khazohpa ta vâlyuhchâpazy hry liata ahy hnohta hmahta he biezy he reih beih vei,“Nâ la, ei Sawchapawpa na châ, atanoh he na Paw ei châ,” “Ano châta paw châ aw na ta, ano cha ei châta Sawchapawpa a châ aw,” tahpa hih.

⁶ Khazohpa ta Sawchapawpa, saw tuapa cha khizaw liata a tuah nota,“Khazohpa vâlyuhchâpa zydua chhaota ano a naoh mawh sy,” tah heih ta.

⁷ Khazohpa ta vâlyuhchâpazy kyh liana chata he tana heta a reih, “Ano chata a vâlyuhchâpazy cha thlih ta pachâsa tyh ta, a chakaotuhpazy chhao mei paleih ta a pachâsa tyh,” tahpa hih.

⁸ Sawchapawpa kyh liata deikua cha he tana heta a reih, “Hy Khazohpa, na beidyuchhai cha chhâzaw ta a y awpa a châ, siana chôhchahrei chhao cha na khihnarâh chôhchahrei cha a châ.

⁹ Siana cha pasô chi ta hmoparaona cha nâ hao; chavâta Khazohpa na Khazohpa chata,na viasazy hlâna chata thaphana thaw thata a cha thu hih,” tahpa nata

¹⁰ “Nâ, Abeipa y, a thao tuana liata aleilô bôna bô haw chi ta, avâzy chhao na kuzy hriana a châ;

¹¹ chazy cha leidia aw ta, nâ deikua a y palâh awpa na châ; cha zydua cha chysia hawhta paro aw ta,

¹² poh hawhta chaty hra aw chi ta, chysia hawh tlaita a vaw nano ha aw. Nâ deikua cha na ualua ta khâ y chi ta,na kôzy chhao chhâ beih aw vei.” tahpata.

¹³ Khazohpa ta a vâlyuhchâpazy hry liata ahy kyh liata ma he tana heta a reih, “Na khakhaipazy na phei tlyna ta ei tao hlâ lei la, ei chachâh lâta a tyuh teh,” tahpa hih.

¹⁴ Âmo zydua ta chakaona thlahpazy, pachhana ryutotuh awpazy châta chakao awpata tuapa châ vei ei mâ?;