Zami第1章

¹ Zami, Khazohpa nata Abeipa Zisu Krista sei ta: Pho hrawhleino a paipatlapazy cha a naoh na.

² Unawh saih u, namâ ngiapâna pasiana chata tiamana a tao tahpa pahnopata,

³ reipasaona to namâ tyh tita alyna saita a ngia teh u.

⁴ Chatawhcha khâpa hmah aphahla leipata, pakipata nama pôhpa zydua ta namâ boh thei nawpata, tiamana chata hria paki mawh sy.

⁵ Nama hry liata ahyrai ta sona a phahla khiahtala thlyu leipa ta, a pietuhpa Khazohpa cha hiah mawh sy. Chatanachata a hnohta piepa a châ aw.

⁶ Châhrasala a lôlei cha chei leipata, ngiapâna hneipata hiah mawh sy, a lôleituhpa cha tilaipi chatlaopa, thlih ta a hmôpa, a phaohpa nata a pathluapa hawhta châ tlôh ta.

⁷ Cha hawhpa chyhsa palôhrupa chybia a hnei leipa,

⁸ a hmotaopa zydua liata â i leipa chata, Abeipa liata khâhma hmô awpata a pangiasa kha se.

⁹ Unawhpa sipasapa cha Khazohpa ta apahneirôhsa khiahtala aly mawh sy,

¹⁰ hneirôhpa chhao chata Khazohpa ta a pahnaisa khiahtala aly hra mawh sy, sibiepa paw hawhta lei thlâh ha tlôh aw ta.

¹¹ Noh vaw chhi ta, thlih lalôhpa a vaw pathli nahta sibiepa pa-uah sa ta, a paw cha zô ta, a yzie angiapa cha a lei tyh. Cha hawhna hra chata chyhsa hneirôhpa cha a siena liana chata uah tlôh aw ta.

¹² Reipasaona pasa a tao hualuapata cha a nohhlao na, pasiapata a y khai tawhta hrona beilakho Abeipa ta ano kyh a pachâtuhpazy hnohta a taipa cha hmô tlôh aw ta.

¹³ Ahyhmah ta reipasaona amâ tyh nota, “Khazohpa tawhtapa reipasaona a châ,” tah kha se; Khazohpa cha moleina ta reipasao theipa rimâ châ vei, ano chhaota ahyhma reipasao beih vei;

¹⁴ chyhsa ta âmo aohraona lâta chhihthapa nata sypata ama y khiahtala, reipasaona amâ tyhpa tlao a châ.

¹⁵ Chatawhcha aohraona chata saw phaoh ta, moleina sa tyh ta; moleina chata a vaw pitloh nata thina a tlô khei tyh.

¹⁶ Unawh kho ngaitapa saih u, dôpata y khah u.

¹⁷ Hmopie phapa nata hmopie pakipa zydua cha chôlâ Khazohpa tawhtapa a vaw pua tyh, ano liana chata ananona nata pananona dita hmahta y vei.

¹⁸ A hmotaopazy hmia a satuhpa hawhta eima châ thei nawpata, ano khona zieta bie hmeiseihpa liana chata maniah a sa.

¹⁹ Unawh kho ngaitapa saih u, chazy cha nama pahno na; chyhsa to ta nahthlie awpa a pachhu ei se, bierei tlao a pachhu leipa ei sala, ama pathi-ia ru se.

²⁰ Chyhsapa pathi-iana ta Khazohpa siana cha tao tlôh va.

²¹ Chavâta apuapa zydua nata moleina a khô pathlahpa pahlei khai ula, bie chi hawhta a pyupa nama thlahpa a pachha theipa cha a reisi ngaitapata a pyh teh u.

²² Châhrasala nâmosasy ta a dopata a nahthlietuhpa dei châ leipata, bie a zyhtuhpa tlao vaw châ teh u.

²³ Ahyrai bie a theituhpa châ pata, a zyhtuhpa a châ tlôh vei khiahta cha, chyhsa thlalâ liata a pikheina hmia a phapata a mopa hawhpa cha a châ;

²⁴ pakhâtata a mo ta sie ta, kheihawhpa chyhsa ma a châ tahpa thlai a my ha tyh tlôh ta.

²⁵ Châhrasala ahyrai ryhpa pakipa, khotalaina ryhpa he liahsa moh ta, cha hawhta y thlâh ha ta, thei ta thlai a my thlâh hatuhpa châ leipata, zyhpata rai khâ a hriatuhpa tlao a châpa cha, cha chyhsa cha a hmotaopa liata byhnâ hmôpata a y aw.

²⁶ Ahyrai phôryhpa pachâpata a pangiasa ta, a paleih a vaih tlôh leipa cha, ano pathipalôh tlao a dôpa a châ, cha phôryhpa achhyna zie cha khâpahma châ vei.

²⁷ Eima Khazohpa nata Paw mohmô liata phôryhpa achhyna pathaihpa nata molei a hlao leina cha he he a châ, hârapa nata nôhmeizy ama riethei nota a hmô nata khizaw puapa kiah leipata a taopa hih.;