Zeremiah第3章

¹ Chyhsa ta lahpinô ma sala,ano siesaipa ta vahpa hropa a pyh sala,ano chata a vaw pyh heih aw ma? Chanô cha thata puapaleipa ta chhâzaw ta y aw vei ma? tah ei ta. Nâ deikua cha kyhpachâtuhpa hluhpi hnohta sihrypa ta y chi ta; cha ta chôna chata kei lâta na vaw kua heih aw ma?ABEIPA ta a tah."

² A sâhpa su pathaihparohpa lâta na mozy kaw ua la, moh teh! Ama cha kiakhei leina su khataih liata a y? Râhpathohpa liata Arabia chyhsa hawhna tlai ta,âmo hâpa ta lâkiazy liata nâ tyuh thlâh ha tyh.Na sihryna zy nata na moleina zy ta râh cha na papuapalei khai haw.

³ Chavâta avâ cha pasuasapa châ leipa ta,vâsua hnôh lâtahpa chhao suah hra vei; chyhsa sihrypa hmia phaopa hawhta phaoh chi ta,na hmia kawh kaw tlôh chi ta.

⁴ ‘Ei pâ y, ei satlia nota na chhihthatuhpa na châ,’Tahpa ta eina awpa chi châ vei ma?

⁵ Chhâzaw ta a pathi a ia aw ma? A chhâna taihta ma a pathi iapa ta a y aw? Pachâ teh, cha hawhna chata reih tlai chi ta,châhrasala a molei thei chaipa hawhta hmo tao chi ta.

⁶ Zôsiah abei nota, ABEIPA ta ei hnohta, “Hnôh lâ a sy khohpa Izarel hmotaopa kha na hmô ma? Tlâh sâhpa to liata khypa ta thobuh to ry liata zy a sihryna hmo a taopazy kha?

⁷ Kei chata, ‘He hmo zydua a tao khai tawhna heta kei lâta a vaw kua hei aw tly’, tah na ta; châhrasala vaw kua hlei leipa ta; chatawhcha a na rônô dôhmâhpa Zudah chata hmô haw hra ta.

⁸ Ano chata hnôh lâ a sy khohpa, Izarel cha a sihryna vâ tlai ta mapa ta, mana châ ei piepa a hmôpa chhaota; a narônô dôhmâhpa Zudah chata chi hlei leipa ta, tlao vawh ta sihryna hmo kei tao hra ta.

⁹ A sihryna a papeisa leipa vâta, râh cha papuapalei khai haw ta, alô nata tho thabypa liata sihry haw ta.

¹⁰ Chata chôna chhaota, a narônô dôhmâhpa Zudah cha pathipalôh hmeiseihpa ta kei lâta vaw kua leipa ta a pakheipa ta vaw kua ta, ABEIPA ta a tah.”

¹¹ Chatawhcha ABEIPA ta ei hnohta, “Hnôh lâ a sy tyhpa Izarel chata a narônô dôhmâhpa Zudah hlâna chata a sia viapa ta a palâsa ta.

¹² ‘Sie la, he biezy he maw lâ kei phuah teh,hnôh lâ a sy khaipa Izarel y,vaw kua te, ABEIPA ta a tah. Hiehâh hmia phaopa ta cha moh leipa aw ei na ta; zawngiah thei ngaitapa châ tlôh na ta, ABEIPA ta a tah; chhâzaw ta hiehâhpa ta y aw va na.

¹³ ABEIPA na Khazohpa chô liata nâ tyna zy thobuh ry liata khichhaipa chyhsazy hnohta na pasaina zy,ei reikah na zyh leina zyta na hmoparaona liana chata reihpha cheih teh,ABEIPA ta a tah.

¹⁴ Hy hnôh lâ a sy khohpa sawzy saih u, vaw kua teh u,ABEIPA ta a tah; nâmo lâta vahpa châ tlôh na ta; nama hry tawhta khihpi liatahpa pano cha la aw ei na ta,Zaio lâta ei châ chhi aw ei,

¹⁵ “‘Ei palôh hawhpa mietahkuvaihtuhpazy cha pie aw ei na ta, âmo ta pahnona nata novâhna zy ta ama cha pasa aw.

¹⁶ Chatawhcha vaw hluhpa ta râh liata nama vaw pôh tita, cha nohzy liana chata âmo ta, “ABEIPA Biehrai Byh,” tah beih khao aw veih ei, ABEIPA ta a tah. Ama palôhrupa liata a ngia leipa aw ta, nâ thei thlâh hra aw veih ei; ngiabâh khao leipa aw ei ta, tao khao hra aw veih ei.

¹⁷ cha daihti liana chata Zerusale cha ABEIPA abeidyuchhai bi aw ei ta; cha liana chata phopi zydua cha ABEIPA mohta Zerusale liata amâ vy pakhy aw; ama pathipalôh moleina pachyuna hawhna chata y khao aw veih ei.

¹⁸ Cha nohzy liana chata Zudah chhôhkhapa zy cha Izarel chhôhkhapa zy chhaota hmaohkha ta y aw ei ta, maw lâ râh tawhta ama pathlapazy hnohta ryuto awpa ta ei piepa râh liana chata hmaohkha ta amâ vaw ngia aw.

¹⁹ “‘Kei deikua chata,pho hluhpi hry liata ryuto awpa pha chaipa râh pha ngaitapa cha piepa ta sawnawhzy hry liata cha sopa ei khoh zie cha,Ei paw, tahpa ta na padopa ta eina zi na tawhtapa tlei aw va chi,tahpa vaw pangiasa na ta.

²⁰ Lahpinô dôhmâhpa ta a vahpa a pheisaipa hawhta,hy Izarel chhôhkhapa saih u,eina dô ha eichi he,’ ABEIPA ta a tah.”

²¹ A sâhpa su pathaihparohpa chhôh liata pyu a y na,Izarel sawzy châpa nata hmo ahawpa pyu cha; ABEIPA ama Khazohpa my ei ta,ama yzie khâpa hrao leipa ta ama pachâsa hawpa vâta.

²² “Hy hnôh lâ a sy khohpa sawzy saih u,vaw kua ula,nama hnôh lâ a sy tyhna zy cha, ei patlâh aw na,“Moh teh, nâ lâta ei vy hih,nâ cha ABEIPA eima Khazohpa châ tlôh chi ta.

²³ Hmeiseihpa ta tlâhzy he phahnai leipa ta tlâh chô liata pyu paro ngâpazy he. Izarel pachhana cha ABEIPA eima Khazohpa liana tlai heta a y.

²⁴ “Châhrasala cha hmo pasichhihpa chata eima thyutlia no tawhta eima pathlatuhpazy ta tha ama hryuna cha nie khai haw ta, ama mietahkupa zawzy ama sahroh zawzy, ama sawchapaw zy, ama sawchanô zy taih chhaota.

²⁵ Nozapa ta a zia ei suh u, eima maophyuna ta maniah khu mawh sy; ABEIPA eima Khazohpa chô liata hmo parao pi ta, keimo nata eima pathlatuhpazy ta, eima thyutlia no tawhta atanoh taihta; ABEIPA eima Khazohpa reikah eimâ ngiah leipa vâta.”