Zoel第1章

¹ Pethuel sawchapawpa Zôel hnohta ABEIPA bie a vaw tlôpa cha:

² Pawpipa saih u, he he thei teh u, he râh liata a pahrâpa zydua saih u, nah pachôh teh u! He he nama daihti nota nata nama mahpawzy daihti nota chhaota a y beih ma?

³ Cha cha nama sawzy chho ula,nama sawzy chata ama sawzy chho ei sala, ama saw pachhuahpazy chata chhâ hropa chho lymâ ei se.

⁴ Tyka nie bâhpa maih cha kuri ta nie ta; kuri ta a nie bâhpa maih cha khawthlôhraipa ta nie ta. Khawthlôhraipa ta a nie bâhpa maih cha chângyu ta nie khai ta.

⁵ Paripa saih u, thyu ula, cha teh u; kresawti a dohpa zydua saih u, a kresawti thlôhpa vâna chata a tlaokali teh u; nama pakah tawhtapa la hawpa châ tlôh ta.

⁶ Pho thatlô ngaitapa, rei tiah lei, ei râh liata vaw pua haw tlôh ei ta; ama hâh cha chakeibarôhneipa hâh hawhta châ ta, chakeibarôhneipa hâh lai ngaitapa hawhpa ama hnei hra.

⁷ Ei krezô parao ta, ei theiku kô hy khai ta; a siapa ta khai ta, thy pathlah ta; a chiahzy cha parâ khai ha ta.

⁸ Laihsa ta latho poh a saipa ta, a locho noh vahpa mâchhie a sapa hawhta thata cha ta.

⁹ Niepa hlâna zy, dopa hlâna zy cha ABEIPA o tawhtapa pahleipa châ ta. Theihthaipa, ABEIPA chakaotuhpazy cha ama pachâ rôh ta.

¹⁰ Lyu cha paraopa châ ta, râh cha pachârôhpa ta y ta; zâ cha paraopa châ ta; kresawti thiehpa cha kua haw ta, thaw cha hie haw ta.

¹¹ Hy, nâmo lyu a taotuhpa saih u, pachârôhpa ta y ula; hy, nâmo krezô a mohôhtuhpa saih u, uit sâh nata bâli sâh vâta pachâ chhie teh u; lyu liata sâh hria awpa cha leidia haw tlôh ta.

¹² Krezô cha uah ta, theiku kô cha rao ta. Pawmikranat thei kô zy, thiahrazy nata apple thei kô zy, lyu liata tho zydua cha uah khai haw ta; chyhsa sawzy hry liata alyna cha dia haw tlôh ta.

¹³ Nâmo theihthaipazy saih u, latho poh a sai ula, cha teh u;nâmo maisâh chakaotuhpazy saih u,pachâ chhie teh u.Nâmo ei Khazohpa chakaotuhpazy saih u,a vy ula, latho poh a bupa ta zâkhidei ta a zia teh u!Nama Khazohpa o tawhna chata niepa hlâna nata dopa hlâna cha pakhâpa châ tlôh ta.

¹⁴ Nie leipa daihti pathaisa ula, pakhypi pathaihpa tao ula, ABEIPA nama Khazohpa o liana chata pawpipazy nata he râh liata a pahrâpa zydua cha pakhy ula;ABEIPA cha aw teh u.

¹⁵ Cha noh cha a hu a po na! ABEIPA noh cha a hnia tlôh ta, Atotaotheipa tawhtapa leidiana hawhpa a vaw tlô aw.

¹⁶ Eima mohmô liata niepa pahleipa châ vei ma, eima thaphana nata eimâ lyna cha eima Khazohpa o tawhtapa pahleipa châ vei ma?

¹⁷ Chizy chata bâtlâh ry liana zy chata thu ta, apâhzy cha roryhrapa ta y ta; sawvâzy phiepa ta y ta, sâh cha uah ha tlôh ta.

¹⁸ Sahrohzy cha ama sôh kaw dia! Viahchao hrizy cha ama nôpo ta, sibiepa hropa su ama hnei leipa vâta; mietahkupa zawzy cha roryhrapa ta y ta.

¹⁹ Hy ABEIPA, ei cha pado. Mei chata râhpathohpa râh sibiepa su cha kâ khai ha ta, meipaleih chata lyurâhpa tho zydua cha kâ khai ha tlôh ta.

²⁰ Lyurâhpa sazy chata cha aw sao ei ta; vatiezy a kua hapa vâta mei chata râh sibiepa su cha patlô ha tlôh ta.