Zuda第1章

¹ Zuda, Zisu Krista sei nata Zami unawhpa chata-

² Zawngiahna zy, adyhna zy, kyhpachâna zy, nama chô liata papôhsapata y mawh sy.

³ Kho ngaitapa saih u, pachhana eima to chyupa bie nama hnohta roh awpa thata ei chhuah nota, mopathaihpazy hnohta ngiapâna eikha pavaosapa lâna chata phahnai khoh ngaitapata teipata cha pasyu awpa ei ta nama hnohta châ ro a byuh ngaitapata ei pahno.

⁴ Chyhsa ahyzy tlyma a ru lâta â ngiahpa y tlôh ei ta, eikha nota he thai leina to awpata raopa zydua cha; chazy cha Khazohpa a pachâ leipa chyhsa châ ei ta, eima Khazohpa ngiachhiena cha parâna lâta pachâsa ei ta, eima Hyutuhpa nata eima Beipa hneichhôhpa, Zisu Krista cha a paphasai haw ei ta.

⁵ Chatawhcha ato eikha pahno hra ula, Abeipa chata Izi râh tawhtapa chyhsazy pachha ta, cha hnôh lâta angiapâ leipazy a pahleipadiazie ei kha ei cha pahnosa khoh hra ei.

⁶ Vâlyuhchâpazy ama lyuhchâpa châna a pyh leipa ama yna tyhpa a siesaipazy cha, noh rônahpa ryureina noh chata a zohpa ry liata chhâzaw bâlia ta chahryna chôta ano ta a khaih ei.

⁷ Sawdawma nata Kawmawra nata ama chheipâh liata khihpizy chhaota, cha hawhna hra chata apheipata nata aohraopata ama ypa vâna chata a pamosa nawpata chhâzaw mei liata hriepa ama châpa hawhna khata.

⁸ Cha chyhsazy chhao chata cha hawhna hra chata ama mâ lâta sapa papuapalei ei ta, biehneina mopakhô ei ta, rônahpazy ama reipachhie tyh.

⁹ Mikhael vâlyuhchâpa chônôchaipa hmah khata. Ahripa nata a tei ei ta, Mawsi ri kyh amâ ei nona khata, Ahripa kyh pachiapata reipachhie ngâh leipata, “Abeipa ta tlao cha ra se,” tah ta.

¹⁰ Cha chyhsazy deikua chata ama pahno leipa maih reipachhie tyh ei ta; pachâna a hnei leipa sazy hawhta pahnona pikheipa ama hneipa zy cha, cha kyh liana tlai chata ama parao tyh.

¹¹ Ama hu a po na! Kaina lâthlôh cha a chhih ei ta, hlao hmô awpata Balama lâthlôh liana cha a pahleipadia ei ta, Kôrah hawhna khata aty ei ta, ama leidia ha khawh.

¹² Chazy chata nama hnohta kyh ama chhi nota kyhpachâna kyhchhizy cha apapuapaleipazy châ ei ta, china cha a pahno leipata âmosasy ta a pasapazy dei ama châ; meihdo ti a hnei leipa thlih ta a phaoh pahaipa hawhpa cha châ ei ta; chapô tho a pathei thai leipa ei nota a thi hawpa, a thari chhaota phiapa hawhpazy ama châ.

¹³ Tilaipi a chatlao ta apathluapa, âmo maophyuhna liata a buchaphy a papuapazy châ ei ta; awhsi a khie ngâpa, a zohkachupa cha âmo châta chhâzaw ta sopa a châ.

¹⁴ Enawka, Adâh tawhta chhâ sarina chata cha hawhpa chyhsazy thâtih cha chhochhielie ta, “Pachâ teh u, Abeipa cha a vâlyuhchâpa pathaihpa thykhazy chhaota a vy aw.

¹⁵ Chyhsa zydua chôta pachia awpata nata Khazohpa pachâ leipa zydua Khazohpa pachâ leipa chôta ama raihriana kyh zydua liata nata Khazohpa a pachâ leipa a moleipazy ta a chô liata bie pachyu ngaitapata ama reina kyh zydua liata thai lei a pachâsa aw,” tahpata.

¹⁶ Chazy cha a paphôhtuhpazy nata a reipasipasuatuhpazy châ ei ta, ama aohraonazy zi lymâpata y ei ta, ama pakah ta apalaina bie thata reih ei ta, athôhna ama khopa vâta chyhsazy ama reithai pakhei tyh.

¹⁷ Châhrasala kho ngaitapa saih u, nâmo la eima Beipa Zisu Krista apôstôlzy ta ama cha chhochhieliepazy kha pahno thlâh ha teh u;

¹⁸ “Daihti hnôh lâna chata Khazohpa pachâ leina, ama aohraonazy zi lymâpata, a pasipasawtuhpazy ama vaw y aw,” tahpata nama hnohta ama reipa kha.

¹⁹ Cha chyhsazy sapa, thlahpa a hnei leipa, py nanopa a taotuhpa ama châ.

²⁰ Châhrasala kho ngaitapa saih u, nâmo la namâ ngiapâna pathaih chaipa chô liana chata nâmosasy ta tha a patlô teh u. Thlahpa Pathaihpa liata thlahchhâ teh u;

²¹ Khazohpa kyhpachâna liana chata a pabohsa ula, chhâzaw hrona to nawpata eima Beipa Zisu Krista ngiachhiena cha hâ teh u.

²² Chyhsa thokha a lôleipata a ypazy cha ngiachhie teh u;

²³ thokha mei tawhtapa la parah ula, pachha teh u; thokha ama sapa a pualeipa a hlaopa chysia taih chhaota pasipata, china chôta ngiachhie teh u.

²⁴ Nama pao lei nawpata cha hrôbie theipa ei nahta a rônahna hmiakô liata a thata alyna chôta seina hnei leipata cha soh theipa ei,

²⁵ maniah Pachhatuhpa Khazohpa hmeiseihpa deita hnohna chata eima Beipa Zisu Krista vâta daihti zydua y hlâta nata atahmâ nata chhâzaw ta, palyupalihna zy, rônahna zy, biehneina zy y mawh sy, Amen.;