Luka第24章

¹ Noh sari liata noh hmiatua chaipa liana deikua cha, a pavâ hiehuhpa ta, chanôzy cha khâpaleipa rohpahâhpa amâ chhuahnohpazy cha cheipa ta, thlâ lâna chata vawh ei ta.

² Chatawhcha thlâ tawhta alô cha pahluah hapa ta hmô ei ta,

³ a ngia ei ta, Abeipa Zisu ri cha hmô tlôh leipa ei ta.

⁴ Chazy vâna chata ama nôpo ta, chyhsa pano, poh di ngaitapa a bupa ama kiapâh liata thlai a vaw duah ei ta;

⁵ ama hmia alei lâ a khupa ta ama y nota, âmo chata ama hnohta, “Khazia a thihpa hryta a hrohpa nama tlua?

⁶ He liata y khao vei, a thyu haw heih, Kalili râh liata a y nota nama hnohta bie a reipa kha a thei heih teh u,

⁷ Chyhsa Sawchapawpa he moleipazy ku ta patusapa ta y aw ta, kraws liata khaipâ aw ei ta, noh thôh noh ta a thyu heih awpa a châ, a tahpa kha,” tah ei ta.

⁸ Chatawhcha a bie cha a vaw thei heih ei ta,

⁹ thlâ tawhtapa cha kua ei ta, pahrawhleikhazy nata mo hropa zydua hnohna chata, cha hmo zydua cha chho ei ta.

¹⁰ Cha chanôzy cha Mari Madali zy, Zôana zy, Zami nô Mari zy châ ei ta, ama hnohta chanô hropazy chhaota, apôstôlzy lâna chata cha biezy cha chho hra ei ta;

¹¹ châhrasala cha biezy cha bie thlâhthlihpa ta rao ei ta, zo leipa ei ta.

¹² Châhrasala Pity cha thyu ta, thlâ lâna cha a râ ta; a bôh ta, moh ta, poh rih dipazy deita cha hmô ta, chatanachata hmo yzie cha noâh ngaitapa ta a o lâ a di ha ta.

¹³ Cha noh liana tlai chata ama hryta chyhsa pano cha khih miakha Emasa ama tahpa lâna chata sie ei ta, cha khih cha Zerusale khih tawhta me sari rachhôh a châ,

¹⁴ hmo a vaw tlôpa zydua cha reih khoh lymâ ei ta.

¹⁵ Chatawhcha reipa ta amâ ei hai nona chata Zisu tlai ta vaw pangai ta, ama hnohta sie ha hra ta.

¹⁶ Châhrasala ano cha ama pahno lei nawpa ta ama mozy aliepa ta y ha ta.

¹⁷ Ama hnohta, “Nama sie nota nama reipa kha khâpa bie maw?” tah ta. Pachârôhpa ta a duah ei ta.

¹⁸ A moh Kliôpa chata a hnohta, “Zerusale khih liata nâma deita ta a ypa ma na châ, atahmâhlâ hmo yzie he na pahno vei tly?” tah ta a chhy ta.

¹⁹ Chatawhcha ano chata ama hnohta, “Khâpa hmo maw?” tah ta. Chatawhcha âmo chata a hnohta, “Nazari Zisu, Khazohpa nata chyhsa zydua mohmô ta a bie liata nata a hmotaopa liata hrohsopa moh pathâh ngaitapa thâtih,

²⁰ theihthaipa abeizy nata eima hyutuhpazy ta thie bie pie awpa ta a chhi ei ta, kraws liata ama khaipânazie kyhzy chhao kha.

²¹ Keimo ta Izarel chatlaituh awpa kha a châ awpa ta eima hnabei a sei thlâ bao nahta. Khâparai châ sala cha hmozy tlôna tawhna chata atanoh he noh thôh a châ haw.

²² Chazy leipa chhao cha eima sahlaozy chanô ahyzy tlyma my ta thlâ lâ vawh ei ta, eima no maniah vaw pa-âhsa ei ta,

²³ a rie hmo tlô leipa ta; vâlyuhchâpazy aluahpa hmô ei ta, chazy chata a hroh haw heihpa ta ama chhopa vaw reih ei ta.

²⁴ Eima y lâhpa hryta ahyzy tlyma thlâ lâna chata vawh ei ta, chanôzy reipa hawhna tlaita hmô ei ta; châhrasala ano cha hmô tlôh leipa ei ta,” tah ei ta.

²⁵ Ano chata ama hnohta, “Ahrupa saih u, hrohsopazy bie reipa zydua ngiapâna kyh liata nainôsôpazy saih u!

²⁶ Mesia ta cha hmozy cha pasa taopa ta a rônahna liata a ngia awpa châ tlai vei ma?” tah ta.

²⁷ Mawsi nata hrohsopa zydua cha liata pathao ta, Khazohpa cha bie zydua ano thâtih ropa maih cha âmo chhopasia lymâ ta.

²⁸ Ama siena awpa khih cha tlô daihmâ ha ei ta. Ano cha a hla via sie a chhuahpa hawhta y ta,

²⁹ châhrasala thlyu ei ta, “Eima hnohta tlô mah y, zâlâ daihmâ ha ta, noh chhao a tla daihmâ ha hih,” tah ei ta. Ama hnohta tlô awpa ta a ngia ha ta.

³⁰ Chatawhcha ama hnohta pati dôhpa ta a tyuh nahta viahchhâ la ta, byhnâ aw ta, pachhaih ta, ama hnohta pie ta.

³¹ “Ama mo vaw pavâh ha ta, pahno haw ei ta; ama mohmô tawhta ano cha lei ha ta.

³² Âmo chata, “Lâpi liata bie maniah a chho nota Khazohpa cha biezy maniah a chhopasia nona khata eima pathipalôh kâ ngâ tlai vei ma khâ?” a tah ei ta.

³³ Cha dawh tlai chata thyu ei ta, Zerusale khih lâta kua ei ta; pahrawhleikhazy nata ama viasazy a ypakhypa cha hmô ei ta,

³⁴ “Abeipa cha a thyu haw tlai na, Saimaw hnohta a luah haw!” tah ei ta.

³⁵ Âmo chhaota, lâpi liata hmo a vaw tlôpa nata viahchhâ pachhaih ta a hmia ama pahno hanazie zy cha chho hra ei ta.

³⁶ Cha biezy cha ama rei hai nota, Zisu tlai cha ama hry liata a vaw duah ta, ama hnohta, “Nama chô liata thlahlôhna y mawh sy,” tah ta.

³⁷ Châhrasala a rarôh paysa ngaita ei ta, chi ei ta, thlahpa a hmôpa ta a rao ei ta.

³⁸ Ano chata ama hnohta, “Khazia atymâpa ta nama y, khazia nama palôhrupa liata alôh leina a y?

³⁹ Ei kuzy, ei pheipazahzy he moh teh u, keima tlai kha ei châ hih; na hria ula, moh teh u; nama hmôpa hawhna heta thlahpa ta sapa nata ruzy hnei vei,” tah ta.

⁴⁰ Cha cha a rei khai nahta a kuzy, a pheipazahzy ama hnohta pamosa ta.

⁴¹ Amâ ly tu hapa vâta zo leipa ta y ei ta, noâhpa ta ama y chhôhta ama hnohta, “He liata khâpaleipa nie awpa nama hnei ma?” tah ta.

⁴² Chatawhcha ngasa rao chiehpa tlaw kha pie ei ta,

⁴³ la ta, ama hmiakô liana chata nie ha ta.

⁴⁴ Chatawhcha ama hnohta, “Hezy he ei bie kha a châ, Mawsi ryhpa liata zy, hrohsopa châbu liata zy, Hlazy châbu liata zy, ei thâtih ropa maih a vaw tlô awpa zie nama hnohta ei y nota ei cha chho tyhpa ei kha,” tah ta.

⁴⁵ Chatanachata Khazohpa cha bie pahno nawpa ta ama pathipalôh no pavâhsa ha ta,

⁴⁶ ama hnohta, “He hawhna heta ropa a châ, Mesia chata riethei tao aw ta, noh thôh noh ta athihpa hry tawhtapa thyu heih aw ta,

⁴⁷ ano moh ta rona kyh nata molei ngiahthaina kyh Zerusale khih liata pathaopa ta, pho to hnohta ama chho aw,” tahpa ta.

⁴⁸ Cha hmo zydua cha a pahnotuhpa nama châ.

⁴⁹ Chatawhcha ei paw hmo taipa cha nama chô liata ei vaw tuah aw; chôlâ tawhta hmotaotheina ta tobipa nama châ hlâta deikua cha, khihpi liana heta y thlâh ha teh u,” tah ta.

⁵⁰ Bethani khih kiapâh taihta âmo cha a chhi ta, a bâh pazawh ta âmo byhnâ aw pata.

⁵¹ Chatawhcha byhnâ a aw hai no tlaita âmo cha a chhaih ta, avâ lâ a chhipa ta y ta.

⁵² Chatawhcha a naoh ei ta, aly ngaitapa ta Zerusale khih lâ kua haw ei ta,

⁵³ Khazohpa achhyna-o liata Khazohpa reithaipa ta y tyh ei ta.;