Maka第1章

¹ He he Khazohpa Sawchapawpa, Zisu Krista Thâtihpha a thaona a châ.

² Hrohsopa Isai ropa hawhta pathaopa châ ta: “Moh teh, ei lyuhchâpa na hmiakô liata tuah na ta,

³ Râhpathohpa liata chyhsa awh pa chata; Abeipa lâthlôh chhuahdy ula, a lâthlôhzy patlâh teh u,” tahpa ta.

⁴ Bâtituhpa Zawhana râhpathohpa liata vaw pua ta, moleinazy a ngiahthaina awpa ta rona bâtina biechho ta.

⁵ Zudia râh nata Zerusale khih tawhta chyhsa to ano lâta a vy ei ta; ama moleinazy palâhâhpa ta Zawdâh chavah liata âmo cha bâti pachâsa haw ta.

⁶ Zawhana cha râraoseipa hmi poh a bu ta, a chai liata savori a saih ta, khawsu nata kheihti a nie tyh.

⁷ Ano chata zawpi hnohta, “Ei hnôh lâta keima hlâta chyhsa rôhnah viapa a vy hai, a bôh ta a pheiky ri a pathlâ tlâh chhao châ va na.

⁸ Keima ta ti ta cha bâti ei na ta; ano deikua chata Thlahpa Pathaihpa ta a cha bâti aw ei,” tahpa ta phuah ta.

⁹ Cha nohzy liana cha Zisu Kalili râh Nazari khih tawhta a vy ta, Zawdâh chavah liata Zawhana ta bâti pachâsa haw ta.

¹⁰ Chatawhcha ti tawhtapa a pua pata nahta, avâ a pahypa nata, Thlahpa vachhuh hawhta a chôta a za chohpa hmô ta;

¹¹ avâ tawhta ao vaw pua ta, “Nâ ei Sawchapawpa kho ngaitapa na châ; na chô liata ei ly ngaita na,” tahpa ta.

¹² Chatanachata Thlahpa chata ano cha râhpathohpa liata thlai a chhi ta.

¹³ Râhpathohpa liana chata noh sypalih Sâtâ reipasaopa ta y ta; râhsazy hnohta y ta, vâlyuhchâpazy ta ano deichhy ei ta.

¹⁴ Zawhana ama patu tawhta, Zisu Kalili lâ a vy ta. Khazohpa Thâtihpha chho ta,

¹⁵ “A daihti cha â ki haw, Khazohpa Khihnarâh chhao â hnia haw; ro ula, Thâtihpha cha a ngiapâ teh u,” tahpa ta.

¹⁶ Kalili Tipo kiah liata a sie laih nota, Saimaw nata Saimaw unawhpa Adru cha tipo liata sao ama vaw haipa hmô ta; ngapatutuhpa châ ei ta.

¹⁷ Zisu ta ama hnohta, “Na zi teh u, chyhsa patutuhpa ta cha tao vâ ei na,” tah ta.

¹⁸ Ama saozy cha siesaipa ta thlai zi haw ei ta.

¹⁹ Ano cha bâhta a sie nata, Zebadi sawchapawpa Zami nata a unawhpa Zawhana, balyh liata sao ama thei haipa hmô ta.

²⁰ Âmo cha thlai aw ta; chatanachata ama paw Zebadi nata ama pahlaosapa chyhsazy cha balyh liata siesai ei ta, ano cha ama zi haw.

²¹ Kapynia khih liata a ngia ei ta, pahânoh ta apakhyna-o liata thlai a ngia ta, pachu ha ta.

²² A pachuna cha Ryhpa pachutuhpazy hawhta châ leipa ta, biehnei kawpa hawhta âmo a pachupa vâta ama noâh kaw ta.

²³ Ama pakhyna-o liana chata thlahpa puapa a hneipa chyhsa pakha y ta;

²⁴ ano chata, “Nazari Zisu, kheihta tao awpa e maniah na khoh? Maniah pahlei awpa ta ma nâ vy? Khazohpa Moh Pathaihpa, na châ tahpa ei pahno,” tahpa ta awh ta.

²⁵ Zisu ta thlahpa cha bie pie ta, “A chalih la, a chhôh tawhtapa vaw pua teh” tah ta.

²⁶ Thlahpa puapa chata ano cha thata padaosa ta, ao paro ngaitapa ta awh ta, a chhôh tawhtapa a pua haw.

²⁷ Ama zydua ta noâh ngaitapa ta, “He he khâpa ma a châ tly? Pachuna thiehpa a châ he! Thlahpa puapazy chhaota bie hnei ngaita kawpa ta bie pie ta, a bie amâ ngiahpa he,” tahpa ta a ei ei ta.

²⁸ Kalili râh chhôh zydua liata a thâtih thlai pathâh ha ta.

²⁹ Chatawhcha apakhyna-o tawhtapa ama pua pata nahta, Zami nata Zawhana chhaota, Saimaw nata Adru o liata thlai a ngia ei ta.

³⁰ Saimaw lahpinô nô cha chasipa ta tlâh leipa ta a zia thlâh ha ta, a thâtih cha Zisu thlai chho ei ta.

³¹ Ano cha a hnohta vawh ta, a ku patupa ta pathyu ta, a chasipa cha pai ta; âmo a chakao haw.

³² Zâlâ noh a tla tawhta tlâh leipa zydua nata ahripa ta a patupazy a hnohta a vaw chhi ei ta.

³³ Chatawhcha a khihpi ta ochhi thaby liana cha a vaw y pakhy ei ta.

³⁴ Tlâh leipa hluhpi pasana hri-ohpazy cha patlâh ta, ahripa hluhpi papua hra ta; ahripazy chata ano cha ama pahnopasiapa vâta bie ama reipa pasaih vei.

³⁵ Mydi ta, a pavâh hlâ ta, thyu ta râhpathohpa su lâta sie ta, cha liana chata thlahchhâ ta.

³⁶ Saimaw nata a viasazy chata ano cha tlua ei ta,

³⁷ ano cha ama hmô nahta, a hnohta, “Chyhsa zydua ta ama cha tlua mâ tâh,” tah ei ta.

³⁸ Ano chata ama hnohta, “Khih a hniapa lâzy sie suh vy, cha liana zy chata bie ei chho theina awpa ta; cha cha ei vaw pua chhâna châ tlôh ta,” tah ta.

³⁹ Kalili râh zydua hry ta, ama pakhyna-ozy liata bie pachu ta, ahripazy chhao papua hra ta.

⁴⁰ A hnohta aphawhpa a vy ta, “Na khoh khiahtala eina pathai thei chi na,” tahpa ta a hmiakô liata pakhu paneihpa ta a haw ta,

⁴¹ Zisu chata a tha pasa ngaita kaw ta. Kei paza ta hria ta, “Ei khoh na; pathaipa ta y mah y,” tah ta.

⁴² Chatanachata sôkha ta aphawhpa cha vaw lei ha ta, a pathaih haw.

⁴³ Chatawhcha bie liahsa taih ta, a pasiesa haw,

⁴⁴ a hnohta, “Ahy hnohta hmahta khâpahmah reih leipa la, sie la, theihthaipa hnohta va pamosa la, zawpizy pahnona awpa ta Mawsi ta bie a piepa hawhna khata na pathaisana châta hlâ teh,” tah ta.

⁴⁵ Châhrasala ano cha pua ta, cha thâtih cha thata tlâh awhkheipa ta, phuah ta, cha vâna chata Zisu cha a lâhâhpa ta khih liata a ngia thei khao leipa ta, râhpathohpa suzy liata tlao y ta; su to tawhta ano cha ama vaw pangai tyh.;