Mika第7章

¹ Ei hu a po kaw dia! Nopinoh theilâpa ama pakhy daihti nota ypa hawhta nata kre lyu daihti nota kre kâmothopa hawhta châ tlôh na ta: theilâpa sao nie awpa y vei, ei hrona ta theiku hmo tuapa â phahla.

² Khazohpa a pachâpa chyhsa cha alei tawhta leidia ei ta, thisaih palo awpa ta a byhpa sai châ ei ta; chyhsa tota âmo unawhpa cha saota chadi ei ta.

³ Ama kuzy cha hmopha leipa chô liata tiama ngaitapa ta tao awpa ta pahnieh ei ta; abei chata a haw ta, ryureituhpa chata lymâ a haw ta, molaipa chata a palôhrupa hmoparaona reih ta; cha hawhna chata hmaohkha ta bie amâ paraoh.

⁴ Ama hry liata chyhsa pha chaipa cha bôbaw hawhta châ ta: chyhsa a do chaipa chhao cha sipopa hloh hneipa hlâta a chhih via. Na mota na hmô pata nahta na paona noh a vaw tlô; cha cha ama nôpona noh a châ aw.

⁵ Vaih liata ngâna pachhô khah la, viasa liana chata ngâna pachhô khah u; na kalachhôh liata a ypa lahpinô tawhna chata na pakah ochhizy cha a phapa ta vaih teh.

⁶ Sawchapawpa ta paw moh pachhie ta, sawchanô ta a nô adyuh ta, myunô ta a nohnô a dyuh tlôh ta, chyhsapa khakhaipazy cha ano chhôhkhapa tlai ama châ.

⁷ Kei deikua cha ABEIPA lâta moh aw na ta, ei pachhana Khazohpa cha ei hâ aw ei Khazopa chata ei na nahthlie aw.

⁸ Hy ei khakhaipa y, na palôh nâ eih khâ; ei pao tina chata ei thyu heih aw; zohna liata ei tyuhpa chhaota ABEIPA cha ei châta khaihna a châ aw.

⁹ ABEIPA chô liata hmo ei parao haw vâta, a palôh châ lei ngaitana cha ei phaoh aw, ei kyh na reikheipa ta, ei châta pachiana cha a patlô hlâ lei cha. Khaihna liata na chhihtha aw ta, chatawhcha a siana cha ei hmô aw.

¹⁰ Chatanachata ei khakhaipa ei hnohta, “Khataih liata e ABEIPA na Khazohpa cha?” A tahtuhpa chata cha cha hmô aw ta. maohphyuna ta ano cha a khu aw. Ei mozy heta ano cha moh aw ta; ‘atahmâ cha othliah chiatlao hawhta tlypâpa a châ ha aw.

¹¹ Na kuh pâhchhôzy taona noh awpa cha! Cha noh liana chata a bie raopa cha lâhlapi taihta pakawhpa a châ aw.

¹² Cha noh liana chata Asuria tawhta Izi taihta zy. Izi tawhta Euphrate taihta zy, tilaipi tawhta tilaipi taihta zy nata tlâh tawhta tlâh taihna zy chata nâ lâta amâ vy aw.

¹³ Chata chôna chhao chata râh cha, a chhôh liata a pahrâpazy vâta nata ama hmotaopa theilâpa vâna chata roryh pahrasapa a châ aw.

¹⁴ Kamel Tlâh likawhta lyurâhpa liata yru ngaitapa a ypa na ryuto mietahkupa zaw, na chyhsazy cha na byuthô hmâpa ta pasa la; hlâno hawhna khata Basana nata Kilia liata pasapa ta y ei se.

¹⁵ Izi râh tawhta na pua no hawhna khata a hnohta hmonoâh ngaitapa zy ei pamosa aw.

¹⁶ Pho to ta cha cha hmô aw ei ta, ama hmotaotheina zydua cha ama zakhei aw; ama pakah a chahu aw ei ta, ama nahkhaozy a pâ aw;

¹⁷ Parih hawhta buhchado palie aw ei ta, alei liata alyhpa hawhta ama y na khaoh tawhna chata a chalyuna chôta a vy aw ei ta, ABEIPA eima Khazohpa o lâna cha chi na chôta a heih aw ei ta, ano cha ama chi ha aw.

¹⁸ Nâma hawhta hmoparaona a ngiahthaituhpa nata a ryuto a laibâhpazy hmoparaona a sie pakhôtuhpa Khazohpa ahy e a y? A pathi-iana cha chhâzaw ta a pa-i thlâh ha vei, ngiachhiena liata aly ngaita tyhpa vâta.

¹⁹ A hei heih aw ta, eima chô liata ngiachhiena a hnei aw; eima hmoparaonazy cha a phei ry liata a tlypâ aw. Nâma ta eima moleina zydua cha tilaipi ry a thuh ngaitapa liana chata na thy aw.

²⁰ Hlâno eima mahpawzy hnohta chhie na sa hawpa, Zakaw hnohta bie hmeihseihpa nata Abaraha hnohta ngiachhiena cha na patlô aw.