Philipi mozy第2章

¹ Krista liata châkheina rai zy, kyhpachâna thlahlôhna rai zy, thlahpa a kaona rai zy, thapasana nata ngiachhiena rai zy a y khiahtala,

² palôhrupa miakha ta ypata kyhpachâna miakha hneipata, rei a raohpata palôhrupa miakha ta ypata ei lyna paki teh u.

³ Karâhnei nata apalaipa vâta khâpahma tah leipata, chyhsa to reisi ngaitapata nâmo hlâta mo hropa a pha viapata rao chyu teh u.

⁴ Nâmo eih dei moh leipata mo hropa eih chhao tlao moh chyu teh u.

⁵ Krista Zisu liata palôhrupa pachâna nama hneipa hawhta, nâmo hry lia chhaota hnei teh u.

⁶ Ano ta cha Khazohpa hawhta y ta, Khazohpa tluta ypa cha tlaichhai thei awpata rao leipata,

⁷ chyhsapazy hawhta vaw pihpata, sei hawhta a tao ta, anosasy ta tlao a panawh ta.

⁸ Chyhsa hawhta vaw ypata a panawh ta, thina taihta reingiahpata y haw ta, kraws liata thina tlai cha.

⁹ Cha vâna chata Zisu moh ta chyhsa to avâ liatahpa zy, alei liatahpa zy, alei ry liatahpa zy chhaota, ama pakhu paneih nawpa nata,

¹⁰ Paw Khazohpa parônahsa nawpata Zisu Krista cha Abeipa a châ tahpata paleih to ta a phuah nawpata,

¹¹ Khazohpa ta ano cha thata palyupalih ta, moh zydua ta moh chônôchaipa cha pie haw ta.

¹² Chatanachata ei kho ngaitapazy saih u, bie nama zy tyhpa hawhna khata, ei y nota dei hria leipata, atahmâ ei y vei chhôh heta tlao hria viapata, chipa nata chalyupata nâmo pachhana châta hria teh u;

¹³ ano a lynazie chata tao a chhuah awpa nata tei awpata nâmo liata a hriatuhpa cha Khazohpa châ tlôh ta.

¹⁴ Molei hnei leipa nata nôphapazy, chhâ dyutlai leipa nata chhorupazy hryta Khazohpa saw seina a hnei leipazy nama châ thei nawpata

¹⁵ paphôna nata a einazy y leipata, ato tao teh u. Cha sahlao hry liana chata hrona bie hlâpata khizaw liana heta pakhaituhpa hawhta nama la tyh,

¹⁶ khâpahrao leipata a râpa châ leipata, khâpahrao leipata hriapasapa ei châ hra leipa vâta Krista Noh liana chata palaikhei awpa ei hnei thei aw.

¹⁷ Namâ ngiapâna atheihna nata chakaona chô liana chata leithapata y hra aw sala ei ly, nama zydua ta ei châ lykhei hra ei.

¹⁸ Cha hawhna hra chata nâmo chhao aly ula, nâ lykhei hra teh u.

¹⁹ Nama thâtih pahnopata ei thlah a lôh thei hra nawpata, bohpi leipata Timawthy he nâmo lâ vaw tuah awpata Abeipa Zisu liana chata ei hnabei a seih.

²⁰ Ano hawhta palôhrupa a phaohpa nama yzie hmeiseihpata cha pachâpatu awpa ahyhma hnei tlôh lei khâh na ta.

²¹ Ama zydua ta Zisu Krista chata tlua leipata âmo khopa châta tlao ama tlua tyh.

²² Châhrasala ano he cha pasiapata a y hawnazie nama pahno, saw ta a paw a chakaopa hawhta thâtihpha hie patlana kyh liata eina chakao khei tyhpa kha.

²³ Ei thâtih awpa ei pahno patanahta ano he thlai vaw tuah aw sala, ei tah;

²⁴ châhrasala keima tlai chhao thlai a vy awpa Abeipa liana chata khâchâ ei pangiasa.

²⁵ Epaphrôdita ei unawhpa, ei raihrialâhpa, ei pheisailâhpa nata nama lyuhchâpa ei hmô a phahlapa na deichhytuhpa he, nâmo lâ vaw tuah awpa a byuhpata ei pahno,

²⁶ ano chata nama zydua ta cha vâ ngaita tlôh ei ta, a pasa tahpa nama vaw theipa vâta a pachâ thata rôh ha ta.

²⁷ Thi daihmâna taihta a pasapa châ tlai ta. Châhrasala Khazohpa ta ano cha ngiachhie ta, ano dei châ leipata, pachârôhna chôta pachârôh via heihna ei hnei lei nawpata keima na ngiachhiepa a châ hra.

²⁸ Ano he nama hmô heih tita namâ ly thei nawpa nata kei ei pachârôhna a phahnai thei nawpata, a chatlie viata ei vaw tuah.

²⁹ Chatanachata ano he thapha ngaitapata Abeipa liana chata a vaw ly ula; he hawhpa chyhsa he pasô teh u,

³⁰ nâmo eina deichhyna paki nawpata thi pachâ leipata, teipata Krista raihriana vâta thi daihmâpata y haw tlôh ta.;