Biphuapa第1章

¹ Zisu Krista biephuapa, Khazohpa ta a hnohta a piepa, hmo thlai a vaw y awpa cha a seizy ta ama pahnosa thei nawpata; cha cha Krista ta a vâlyuhchâpa hmâpata a sei Zawhana vaw pahnosa ta.

² Zawhana chata Khazohpa bie nata Zisu Krista pahnosana bie, a hmo hmôpa zydua cha pahnosa ta.

³ He chhochhieliena bie a reituhpa nata nahthlie ta a chhôh liata bie ropa a pyhtuhpazy cha ama nohhlao na; a daihti cha a hnia ha tlôh ta.

⁴ Zawhana chata Asia râh liata awnanopa hlao sarizy hnohna chata: A y haipa nata a y hawpa nata a vaw y awpa tawhta zy, a beidyuchhai hmiakô liata thlahpa pasari a ypa sahlao tawhta zy,

⁵ Zisu Krista bie a pahnosatuhpa ngâchhihpa, athihpa hry liatahpa a pih tua chaipa nata alei liata abeizy ryureituhpa tawhna chata, ngiachhiena nata adyhna nama hnohta y mawh sy. Kyh maniah pachâ ta, a thisaih tlaita eima moleinazy tawhtapa maniah pasi ta.

⁶ Khihnarâh nata a Khazohpa nata a Paw lâta theihthaipata maniah a taotuhpa hnohta, ano hnoh tlaita rônahna nata ryureina cha chhâzaw chhâna taih y mawh sy! Amen.

⁷ Nahthlie teh u, ano cha meihdozy nah chata a zu aw ta, mokhaoh tota hmô aw ta, ano a chôtuhpazy chhao khata; khizaw liata pho zydua ta ano ama chakhei hra aw. Cha tlai se: Amen.

⁸ “Kei, Alpha nata Omeka ei châ,” Abeipa Khazohpa, a y haipa nata a y hawpa nata a vaw y awpa, Atotaotheipa chata a tah.

⁹ Kei Zawhana, nama unawhpa nata Zisu liata rietheina zy, Khihnarâh zy, tao hualuana zy cha taokheipa ei he, Khazohpa bie vâta nata Zisu pahnosana bie vâta Patmô liahpahlô ama tahpa liata y na ta.

¹⁰ “Abeipa noh ta Thlahpa ta vaw y na ta, ei hnôh lâta chiahmie paropa hawhta ao paro ngaitapata,

¹¹ “Na hmo hmôpa cha châbu liata roh la, awnanopa hlao sarizy lâta, Ephesi lâta zy, Smyna lâta zy, Pekamu lâta zy, Thyatira lâta zy, Sadisa lâta zy, Philadelphia lâta zy, Laodisi lâna zy chata paphao teh,” a tahpa thei na ta.

¹² Chatawhcha einâ chhyna ao hmô a chhuahpata a kaw heih na ta, ei kaw heih nah chata, ngôh meiôh sona miasari hmô na ta,

¹³ meiôh sona hry liata ahy tlyma chyhsa sawchapawpa hawhta, a phei pawhmao taihta poh a bupa a chachôhna liata ngôh chaisaina ta a saipa hmô na ta.

¹⁴ A luh nata a sâ cha mietahkupa hmi ngyupa hawhta nata dâhaw hawhta a ngyuhpa; a mokhaoh cha mei paleih hawhta a châ,

¹⁵ a pheipazahzy cha dawh pathliepa hawhta châ ta, patisana mei liata pathaisa hawpa hawhta châ ta; a ao cha tisaozy paropa hawhta a châ.

¹⁶ A ku chachâh lâ chata awhsi sâsari chaba ta, a pakah tawhta zaozi a koh nata a hâh a tiah rairiepa pua ta, a hmia cha noh a sa locho no hawhta a châ.

¹⁷ Ano cha ei hmô patanahta athihpa hawhta a phei thaby liata pao haw na ta. Ano chata a ku chachâh lâ cha ei chô liata pahniehpata ei hnohta, Chi khah y, kei hmia tua chaipa nata hnôh chaipa nata."

¹⁸ a hrohpa cha ei châ; thi haw na ta, châhrasala nahthlie teh. chhâzaw chhâna taihta ei vaw hroh haw hih; Thina nata Athihpakhih châhbizy cha ei hnei hra.

¹⁹ Chatanachata na hmo hmô chiehpa, hmo a y haipa zy nata atahmâ tawhta hmo a vaw y awpazy cha roh teh.

²⁰ Ei ku chachâh lâ liata awhsi sâsari a ypa na hmôpazy nata ngôh meiôh sona sâsarizy bierupa cha, awhsi sâsari cha awnanopa hlao sari lyuhchâpazy châ ei ta; meiôh sâsari cha awnanopa hlao sarizy cha ama châ.;