Rawma mozy第1章

¹ Pawla, Zisu Krista sei. Khazohpa ta apôstôl châ awpa ta a awpa nata Thâtihpha chho awpa ta a pananopa chata he châ paphaopa he a roh.

² Cha Thâtihpha cha hlâno ta Khazohpa ta a hrohsopazy hmâpata bie â taih ha chiehpa, Châropa Pathaihpa liata â rohpazy cha.

³ Cha cha a Sawchapawpa, eima Beipa Zisu Krista thâtih châ ta; a sapa kyh lâta cha Davi pathla ta a pihpa châ ta;

⁴ a thlahpa pathaihna kyh lâta deikua athihpa hry tawhta a thyuheina chata ano cha Khazohpa Sawchapawpa a chânazie thata palâsa ta.

⁵ Ano zawzi ta Khazohpa ta ngiachhiena chôta apôstôl châna maniah patosa ta, cha chata â chhuahpa cha pho to chyhsa ano bie pazyhsa ta pangiapâsa awpa he a châ.

⁶ Cha chata nâmo Rawma khih liata a ypa zydua chhao a cha pahly ei, Khazohpa ta Zisu Krista eih châ awpa ta a awpa nama châ.

⁷ Kei, Pawla heta Rawma khih liata Khazohpa kyhpachâpazy nata ano chyhsa châta a awpazy cha ei châ naoh ei. Khazohpa eima Paw nata Abeipa Zisu Krista tawhtapa ngiachhiena nata thlahlôhna nama hnohta y mawh sy.

⁸ Khizaw zydua liata namâ ngiapâna kyh a pathâhpa vâta, nama zydua chôta ei lyna bie Zisu Krista zawzi ta ei khazohpa lâta ei reih tua.

⁹ Ei thlahchhânazy liana chata bâh leipa ta nama moh reih tyh na ta, atahmâ chhao he nâmo lâta ei vy nawpa ta Khazohpa ta âryh a tah khiahtala

¹⁰ tlyna daihti rypaohpa ei hmô thei nawpa ta ei hiah tyh, a Sawchapawpa Thâtihpha liata ei thlahpa ta ei chakao tyhpa, Khazohpa cha a pahnotuhpa châ tlôh ta.

¹¹ Nama pachyu nawpa ta thlahpa lâ hmopiepa kheihawhpa tlyma ei cha pie thei nawpa ta hmô cha byuh kaw tlôh ei na ta,

¹² cha cha namâ ngiapâna nata ei ngiapâna ta thlah eimâ palôh rairieh thei nawpa ta ei tah.

¹³ Unawh saih u, “Zenitai hropazy lâta ei hriapasana theilâpa ei hmô hawpa hawh hra ta, nama hry liata chhao theilâpazy ei hmô thei hra nawpa ta, nâmo lâ ei hluhpi a vy ei chhuah haw tahpa nama pahno lei awpa khoh leipa na ta, châhrasala cha hlâ zydua khata pakhâpa ta y tyh na ta.

¹⁴ Krika mozy nata râh hropa chyhsazy lâta abâhpa ei hnei, chyhsa sopa nata a so leipazy lâta chhao:

¹⁵ nâmo Rawma khih liata a ypazy hnohta chhao Thâtihpha thata chho awpa ta ei mâ thlâh haw.

¹⁶ Thâtihpha cha zakhei tlôh lei khâh na ta: ahyrai a ngiapâpa maih châta pachha nawpa ta Khazohpa hmotaotheina châ tlôh ta, a hmiatua ta Zu chyhsa châta châ ta, Krika mo châta chhao châ heih ta.

¹⁷ Cha liana chata ngiapâ pachai nawpa ta ngiapâna ta Khazohpa siazie cha â vaw luah ta, “A ngiapâ vâta thaipachâsapa chyhsa chata hrona a hnei aw,” tahpa ta ropa hawhna khata.

¹⁸ Ama moleinazy ta bie hmeiseihpa a pakhâtuhpazy, Khazohpa pachâ leina nata sia leina zydua chô liata avâ tawhta Khazohpa hiehâhna â vaw luah.

¹⁹ Khazohpa thâtih a pahno awpa chyhsa cha, ama palôhrupa liata pahnosapa ta y tlôh ta.

²⁰ A hmo hmô thei leipa, a chhâzaw hmotaotheina nata a khazohnazie cha khizaw tao tua no tawhta a siapa ta hmôpa ta y ta, hmotaopa liata â lâ. Chatanachata rei nawpa hnei veih ei;

²¹ Khazohpa pahno tlôhpa ta Khazohpa hawhta palyupalih leipa ei ta, alyna bie chhao reih hra veih ei, hmo hrao leipa tlao pachâ via ei ta, ama pathipalôh hrupa cha vaw zoh haw ta.

²² Sopa ta a pachâpa ta, a hrupa lâta vaw châ ei ta,

²³ thi thei leipa Khazohpa rônahpa cha thi theipa chyhsazy nata pavawzy, phei palihpa sazy, alyh theipazy nohthlahpa hawhta pachâsa haw ei ta.

²⁴ Chavâta ama pôhpa nozachhih ngaitapa ta, a tao rairieh awpa ta ama pathipalôh piepie-aohraona hawhta hmo puapa tao pasaipa ta Khazohpa ta â heisai haw.

²⁵ Khazohpa bie hmeiseihpa cha haipa ta pachâsapa ta, a Taotuhpa a chhypa hlâta a taopa cha a chhypa ta tlao chakao tlôh ei ta, Taotuhpa cha chhâzaw ta reithai tlâh a châ! Amen.

²⁶ Cha vâna chata Khazohpa ta nozachhih ngaitapa ta sihry pasaipa ta a heisai ta. Ama chanôzy tlai chhaota ama yzie pikheipa yzie leipa hawhta y awpa ta a panano tlôh ei ta,

²⁷ chapawzy chhaota chanô hmâzie tyhpa bâsaipa ta sihrypa ta y ei ta, chapaw nata chapaw a chhie ngaitapa ta a tao ei ta, ama moleina ty hmô awpa cha âmo liata hmô ei ta.

²⁸ Khazohpa ama pahno khoh leipa vâta, hmo a ngia leipazy tao awpa ta a khoh leipa palôhrupa phaoh pasaipa ta Khazohpa ta â heisai haw.

²⁹ Chatanachata sia leina zydua zy, moleina zydua zy, karâyna zydua zy, kiaphaona zydua zy ta bie ei ta. Hnâchhaona zy, lianycheina zy, ahryuna zy, dôna zy, nôchâ pha leina zy ta bie ei ta, hohiahpa zy,

³⁰ kyh rei hmâhpa zy, Khazohpa ahaopa zy, a tahsapa zy, a palaipa zy, a pahôpahâhpa zy, hmo moleipa hmo chhiepa a papuatuhpa zy, nôpaw rei a ngiah leipa zy,

³¹ palôhrupa a hnei leipa zy, bietai a paraotuhpa zy, kyhpachâna a pikhei leipa zy, zawngiahna a hnei leipa zy châ ei ta.

³² Cha hawhta hmo a taotuhpazy cha a thi awpa tla rai ama châ tahpa Khazohpa raopa cha pahno thlâh hapa ta, âmo deita â tahpa chhao châ leipa ta, mo hropa a tao tyhpazy chô liana chata amâ ly tyh hra.;