4954. ISAHLUKO 39.

Esandulelisweni seSahluko esingaphambi kwalesi kusonjululwe amazwi eNkosi akuMathewu 25:31-33, amayelana noLwahlulelo lwabantu abalungileyo nababi (bheka izinombolo 4807-4810). Lapha kuzosonjululwa amazwi eNkosi alandela lawo, awukuthi: Khona inkosi iyokuthi kwabangakwesokunene sayo: Zanini nina enibusisiweyo nguBaba, nidle ifa lombuso eniwulungiselweyo selokhu kwasekelwa umhlaba. Ngokuba ngangilambile, nangipha ukudla; ngangomile, nangiphuzisa; ngangiwumfokazi, nangingenisa; ngihambaze, nangembathisa; ngangigula, nangihamba; ngangisetilongweni, neza kiMi (Mathewu 25:34-36).

4807. GENESISE 38.

ULWAHLULELO LOKUGCINA

Esingenisweni seSahluko esandulelayo, ezinombolweni 4661-4664 , kwethulwe isiqalo sencazelo yamazwi eNkosi aku25:31-46, amazwi amayelana nokwahlulelwa kwabalungileyo nababi, ababizwa lapho ngezimvu nezimbuzi. Ingqondo engaphakathi yalawomazwi ayikethulwa, nokho isizokwethulwa manje esingenisweni salesiSahluko nasezingenisweni ezimbalwa zeZahluko ezilandela lesi. Kulezozincazelo kuzochacha ukuthi ngokwahlulelwa kokugcina kulomfanekiso iNkosi yayingasho ukuphela noma inkathi yokugcina yomhlaba lapho—okokuqala ngqa—abafileyo beyovuka futhi baqoqane phambi kweNkosi maqede iNkosi ibahlulele, kepha yayisho inkathi yokugcina yomuntu ewukudlula kwakhe emhlabeni edlulela empilweni elandelayo, okuyinkathi okwenzeka ngayo ukwahlulelwa kwakhe. Yilokhu kwahlulelwa okwakushiwo yiNkosi. Nokho ukuthi yilokhu kwahlulelwa okwakushiwo yiNkosi kakubo nakali engqondweni yeZwi engaphandle, kubonakala kuphela engqondweni yalo engaphakathi. Isizathu esasenza ukuba iNkosi ikhulume ngaleyondlela wukuthi yayivame ukukhuluma nabantu ngesu lemifanekiso nezifanekiso noma nezimpawu ezifanekisayo, njengoba yayikhuluma kanjalo naseThestamenteni eliDala nakweliSha. Ngokuba ukukhuluma ngesu lemifanekiso nezimpawu ezifanekisayo kungukukhuluma kanyekanye okuqondiswe emhlabeni nasezulwini, okungukuthi, okuqondiswe kubantu nasezingelosini sikhathisinye. Loluhlobo lokukhuluma lungoloBunkulunkulu, ekubeni luzwakala emhlabeni nasezulwini, nangalesisizathu luyimfanelo yeZwi. Ngakhoke abantu abangenandaba nezinye izinto ngaphandle kwezinto zasemhlabeni wemvelo kabaqondi lutho emagameni akhulunywa yiNkosi mayelana nokwahlulelwa kokugcina; baqonda kuphela ukuthi bonke abantu bayokwahlulelwa kanyekanye, lapho iNkosi iyohlala esihlalweni saYo sodumo maqede ikhulume kubantu abaqoqene phambi kwaYo ngamazwi asemfanekisweni. Kepha abantu abazinakile izinto zasezulwini bayazi ukuthi lowo nalowomuntu uyavuka ngokufa kwakhe, nokuthi amazwi eNkosi kulomfanekiso agodle imfundiso yokuthi lowo nalowomuntu uyokwahlulelwa ngokusukela empilweni yakhe, okungukuthi, umuntu uza nesahlulelo sakhe ngoba uza nempilo yakhe.