Kaolaosa mozy第1章

¹ Pawla, Khazohpa khonazie hawhta Krista Zisu apôstôl nata Timawthy eima unawhpa chata—

² Kaolaosa khih liata Krista liata mopathaihpazy nata unawh ngâchhihpazy hnohna chata: Khazohpa eima Paw tawhtapa ngiachhiena nata adyhna nama hnohta y mawh sy.

³ Avâ liata nama hnabeiseina sopa a châpa vâta Krista Zisu namâ ngiapânazie

⁴ nata mopathaihpa zydua chôta kyhpachâna nama hneizie eima vaw pahno rakha tawhta

⁵ nama châta thlah khâ chhâpata Khazohpa eima Beipa Zisu Krista Paw lâna chata alynabie reih tyh pi ta. Cha hnabeiseina thâtih cha eikhano Thâtihpha bie hmeiseihpa liana khata nama pahno haw.

⁶ Cha thâtihpha cha khizaw zydua liata patheipata a pôh lymâpa hawhna hra heta nama hnohta a vaw tlôpa kha, cha hawhna hra chata Epaphra eima sei heih kho ngaitapa liata namâ chupa hawhta

⁷ hmeiseihpata Khazohpa ngiachhiena cha nahthliepata nama thei noh rakha tawhna khata nâmo liata chhao patheipata a pôh lymâ tyh. Epaphra he keimo vyuhpata Krista chakaotuhpa ngâchhih ngaitapa châ ta,

⁸ ano heta Thlahpa liata nama kyhpachâ na cha maniah chho hra ta.

⁹ Cha vâna chata thlahpa lâ sona nata novâhna zydua kyh liata ano khopa pahno pakina liana chata nama vaw bie thei nawpata, eima pahno noh rakha tawhta cha keimo chhaota nama châta thlahchhâna nata hiana bâh ma pi,

¹⁰ chatanachata raihria to liata patheipata, Khazohpa pahno pakina kyh liata phahnai rilipata, thapha ngaitapata, tiamana nata nôphana to hnei awpata.

¹¹ A rônahna thatlônazie lymâ hawhta, thatlôna to liata thatlôpata. Paw khaihna liata mopathaihpa sahlaozy ryuto cha a hly tlâh châpata maniah a taotuhpa lâna chata

¹² alynabie reipata kyh tota ano palôhpatlâh awpata Abeipa zi tlâh châpata nama y thei aw.

¹³ Ano chata zohna biehneina tawhtapa maniah pachhapata, a Sawchapawpa kyhpachâ ngaitapa khihnarâh liata maniah pakiasa haw ta,

¹⁴ ano liana chata eima chatlaina eima hmô, eima moleizy ngiahthaina cha.

¹⁵ Ano cha hmô thei leipa Khazohpa a lyupa, hmotaopa zydua liata a pih tua chaipa cha châ ta;

¹⁶ ano liata ato taopa châ ta, avâ liata a ypazy, alei liata a ypazy chhao, hmô theipazy, hmô thei leipazy chhao, abeidyuchhaizy chhao, ryureinazy chhao, abeinazy chhao, biehneinazy chhao ato ano taopa a châ, ano châta taopa a châ.

¹⁷ Chatawhcha ano he ato a y hlâta a y thlâh hawpa a châ, ano liana chata ato hmaohkha ta a duah hra.

¹⁸ Awnanopa cha a pôhpa châ ta, ano cha a luh a châ; ato liata chônôchaipa a châ thei nawpata, thina tawhta a thyupa a pih tua chaipa a châ.

¹⁹ Khazohpa ta ano cha a pakina to rai yna châta a tlyh ta,

²⁰ a kraws thisaih chata adyhna taopata ano liana chata ato ano nata a paryhsapa he, Khazohpa palôh châ ngaitana châ tlôh ta, ano liana tlai chata alei liata hmo a ypazy chhao, avâ liata hmo a ypazy chhao, ano nata a paryhsapa he.

²¹ Chatawhcha nâmo, eikhano nama hmotaona moleina liana khata, ano tawhta pachhaihpata y eichi ta,

²² nama pachâna liana chata ano khakhaipa nama châ hrapa kha, châhrasala atahmâ la a hmiakô liana chata pathaih ngaitapa nata thai pachâsapa nata seina hnei leipata a cha paduasa awpa ei ta, a thina ta a sapa pôhpa liana chata ano nata a cha paryhsa haw ei,

²³ a bôna hneipata, a ipata ypata, thâtihpha nama theipa hnabeiseina tawhta apasie tyh leipata, ngiapâna liana heta nama y thlâh ha khiahta cha, cha thâtihpha cha avâ ry liata hmotaopa zydua tlâh-awhkheipa a châpa kha, kei Pawla he, cha chakaotuhpata taopa ei châ.

²⁴ Atahmâ nama châta pasa ei taona liana heta alyna ta, Krista riethei tao laibâpa cha a pôhpa vâta ei sapa liana heta ei pazao lymâ, a pôhpa cha awnanopa sahlao he ama châ.

²⁵ Khazohpa bie chho paki awpata mohôhna raihria Khazohpa ta nama châta eina piepa lymâ hawhta, cha sahlao chakaotuhpata taopa ei châ.

²⁶ Cha Khazohpa bie cha chhâzaw nata chhâ y rakha tawhta bieru a nyupa cha a châ, atahmâ deikua cha a mopathaihpazy hnohta paluahsapata a y haw.

²⁷ Chazy hnohna chata Zenitaizy hry liata cha bienyupa rônahna hnei thluzie cha Khazohpa ta pahnosa a khohpa a châ, cha bienyupa cha Krista nâmo liata a ypa, rônahna hnabeisei chhâpa a châ,

²⁸ Chyhsa to Krista liana chata pha pakipata eima paduasa thei nawpata, chyhsa to chhoreipata, chyhsa to sona tota pachupata, a thâtih eima chho tyhpa he.

²⁹ Cha hawhta paduasa thei awpata thata keima liata a hriapa, cha hriazie lymâ hawhta tei lyliahpata ei hria pasa tyh hra.;