Zeremiah第1章

¹ Benzami râh liata Anathô khih liata theihthaipazy hry liatahpa, Hilkiah sawchapawpa, Zeremiah biezy,

² Zudah beipa, Amawna sawchapawpa Zôsiah daihti nota, abeina kô hrawhleithôhna liana chata a hnohta ABEIPA bie vaw tlô ta.

³ Zudah beipa, Zôsiah sawchapawpa Zehôiki abei no chhaota vaw tlô ta, Zudah beipa Zôsiah sawchapawpa Zedekiah kô hrawhleikhana chhâna, Zerusale sei ta siekheipa thla pangawhna taihna khata.

⁴ ABEIPA bie cha ei hnohta vaw tlô ta,

⁵ “Py chhôh liata ei cha tao hlâta cha pahno na ta, chhi tawhta na pua hlâ chhaota cha pathaisa na ta;phopizy hnohta hrohsopa ta ei cha rao haw,” tahpa ta.

⁶ Chatanachata kei chata, “Aw, Abeipa KHAZOHPA! Pachâ teh, bie rei thai va na, ei hawti bailai,” tah na ta.

⁷ ABEIPA deikua chata ei hnohta, he tana heta tah ta, “‘Hawti ei châ,’ tah khâ; ei cha tuana maihta sie aw chi ta, bie ei cha piepa maih na reih awpa a châ.

⁸ Âmo vâta chi khah y, cha pachha awpa ta na hnohta ei y na, ABEIPA ta a tah.”

⁹ Chatanachata ABEIPA chata a ku vaw pazawh ta ei pakah hria ta; ABEIPA chata ei hnohta, “Nahthlie teh, na pakah liata ei biezy ei soh aw.

¹⁰ Moh teh, phopizy nata khihnarâhzy chô liata phia awpazy nata phie awpazy, pahleipadia awpazy, thy awpazy, sa awpa nata loh awpa ta, he noh liana heta ei cha soh,” tah ta.

¹¹ Chatawhcha ABEIPA bie ei hnohta vaw tlô ta, “Zeremiah y, khâpa na hmô?” tah ta. Kei chata, ‘Almond tho chôhchahrei ei hmô,” tah na ta.

¹² ABEIPA chata ei hnohta, “Na hmôpa â do kaw na: ei bie patlô awpa ta amâ chiehpa ta ei y,” tah ta.

¹³ ABEIPA bie cha a ei nona ta ei hnohta vaw tlô heih ta, “Khâpa na hmô?” tahpa ta. Kei chata, “Beih a tlao ngâpa, a pakah cha maw lâ a heisaipa ei hmô,” tah na ta.

¹⁴ Chatanachata ABEIPA chata ei hnohta, “A râh liata a pahrâpa zydua chô liata maw lâ tawhta hmopha leipa a vaw pua aw.

¹⁵ Pachâ teh, maw lâ khihnarâh phopi zydua aw tlôh aw na ta, tahpa he, ABEIPA bie reipa a châ; a vy aw ei ta, Zerusale chhikao a ngianazy, a chheipâh kuh pâhchhô zydua thaby liata zy nata Zudah khihpi zydua liata zy ama beidyuchhai ama patyuh chyu aw.

¹⁶ Na pathlua ei ta, khazoh hropazy lâta khâpaleipa rohpahâhpa rao ei ta, âmo ku tlai ta taopa achhy ei ta, he ama moleina zydua kyh liata ei bie pachiapa zydua cha ei phuah aw.

¹⁷ Chavâta na chai a saih la, thyu la, bie ei cha piepa zydua cha ama hnohta kei reih teh. Ama hmiakô liata thlahzopa ta y leipa la, chata leipa ta la ama hmiakô liata thlahzopa ta ei cha paysa aw.

¹⁸ Pachâ teh, he noh liana heta a râh zydua, Zudah beizy, abeisaw zy, a theihthaipazy nata cha râh liatahpa tawhna chata kuh dôhna khihpi nata thua tôh nata daw pâhchhô ta ei cha tao hih.

¹⁹ Châ dyuh aw ei ta; châhrasala cha pahnie aw veih ei, cha pachha awpa ta na hnohta y tlôh na ta, tahpa he, ABEIPA reipa a châ.”