Zawhana第1章

¹ A thaona liata Bie a y, Bie cha Khazohpa hnohta a y, Bie cha Khazohpa a châ.

² Ano cha a thaona tawhta Khazohpa hnohta pahrâ ta.

³ Ato zydua ano zawhzi ta Khazohpa ta tao ta; ano leipa ta khâpahmah ta Khazohpa ta a taopa y vei.

⁴ Bie liata hrona y ta, cha hrona cha chyhsazy khaihna a châ.

⁵ A khaihpa cha zohna liata khaih ta; a zohna chata khaihna cha pachhai thei beih vei.

⁶ Khazohpa tuapa chyhsa pakha y ta, a moh cha Zawhana a châ.

⁷ Ano cha chyhsazy hnohta khaihna bie pahnosa awpa ta a vy ta, âmo pahnosa ta, a bie vâta amâ ngiapâ thei nawpa ta.

⁸ Zawhana cha khaihna châ leipa ta, khaihna bie pahnosa awpa ta a vypa tlao a châ.

⁹ Khaihna hmeiseihpa chyhsa to pakhaihsa awpa cha khizaw liata a zu ta.

¹⁰ Bie cha khizaw liata a y, Khazohpa ta ano zawzi ta khizaw cha tao ta; châhrasala khizaw ta ano cha pahno vei.

¹¹ Ano râh lia tlaita a zu ta; châhrasala ano chyhsazy ta aly tlôh ei va.

¹² Châhrasala thokha ano alypa, ano liata angiapâpazy cha Khazohpa sawzy châ thei nawpa biehneina a pie ei.

¹³ Chazy cha chyhsa pienazie hawhta Khazohpa saw a châpa châ leipa ei ta; chyhsapa paw ta a sapa sawzy hawhta châ hra veih ei; Khazohpa tlai cha ama Paw tlao châ tlôh ta.

¹⁴ Bie cha chyhsa hrohpa lâta a vaw lie ta, eima hry liata a pahrâ. A rônahna hmô haw pi ta, ngiachhiena nata hmeiseihna ta a bie. Cha rônahna cha Paw Sawchapawpa matlupa rônahna a châ.

¹⁵ He he Zawhana ta ano a pahnosana cha a châ, “He chyhsa he he hawhta a thâtih ei reipa kha a châ, ‘Ei hnôh lâta a vypa he, keima hlâta tlao rônah via ta’, ano cha ei pie hlâta a y hapa châ tlôh ta,” tah ta.

¹⁶ A pakina tawhta ngiachhiena eima to chyu, ngiachhie chôta ngiachhie pachhuahna chhao.

¹⁷ Khazohpa ta ryhpa cha Mawsi hmâpa ta pie ta, ngiachhiena nata hmeiseihna deikua cha Krista zawhzi ta a vaw ypa a châ.

¹⁸ Ahyhmah ta Khazohpa hmô beih veih ei, Sawchapawpa matlupa, Paw ku chachâh lâta atyuhpa ta, ano a paluahsa tyh.

¹⁹ Zuzy ta, ‘Ahy na châ?” tahpa ta hiahri awpa ta Zerusale khih tawhta ano lâta theihthaipazy nata Livaizy ama tua nona khata, hezy he Zawhana bie pahnosapa cha a châ.

²⁰ A phih leipa ta, a palâhâh ta, “Mesia châ va na,” tahpa ta.

²¹ Cha khiahcha, ‘Ahy e na châ? Elaiza na châ ma?” tahpa ta âmo chata hiahri ei ta. Ano chata “Châ va na,” tah ta. “Hrohsopa kha na châ ma?” tah ei ta. Ano chata, “Châ va na,” tah ta a chhy ta.

²² Âmo chata a hnohta, “Cha khiahla ahy e na châ? Maniah tuahtuhpazy eimâ chhy thei nawpa ta maniah chho teh. Na thâtih rai kheihta e na reih aw?” tah ei ta.

²³ Zawhana chata, “He he ei châ: Abeipa lâthlôh paraih teh u! tahpa ta râhpathoh liata awhtuhpa ao khawh,’ cha cha hrohsopa Isai ta a vaw rei hapa hawhna khata,” tah ta.

²⁴ Ama tuapazy cha Pharisaizy tawhtapa châ ei ta.

²⁵ Âmo chata a hnohta, “Mesia tlyma, Elaiza tlyma, Hrohsopa tlyma chhâh na châ tlôh leipa khiahta cha, khazia e na bâti tyh tly?” tahpa ta hiahri ei ta.

²⁶ Zawhana ta ama hnohta, “Keima ta ti ta ei cha bâti tyh ei, nama hry liata: chyhsa pakha nama pahno leipa â duah,

²⁷ ano cha ei hnôh lâta a vypa châ ta, a pheiky ri pathlâ tlâh chhao châ va na,” tah ta a chhy ta.

²⁸ Cha hmozy cha Zawdah haosâ Bethani khih liata Zawhana ta a bâtina liana khata a vaw tlô.

²⁹ A mylâ ta Zawhana ta Zisu ano lâta a vypa hmô ta, ano ta, “Moh teh u, Khazohpa Mietahkupa Taw khizaw molei siekheituh awpa huh!

³⁰ He chyhsa he he hawhta a thâtih ei reipa kha a châ: ‘Ei hnôh lâta a vypa he, keima hlâta tlao rônah via ta’, ano cha ei pi hlâta a y hapa châ tlôh ta.

³¹ Ano cha ahyma a châ pahno va na, châhrasala he he ei vyna chhâpa cha a châ, ti ta bâti awpa ta, ano cha Izarelzy hnohta a pahnosa thei nawpa ta,” tah ta.

³² He he Zawhana ta pahnosana bie a reipa cha a châ; “Thlahpa vachhuh hawhta avâ tawhta za chôpa hmô na ta, a chô liata a choh ta.

³³ Ano cha pahno to leipa na ta; châhrasala Khazohpa ti ta bâti awpa ta na tuahtuhpa khata ei hnohta, ‘Ahy chô liata rai Thlahpa a za chôpa ta a chô liata a ypa na hmôpa cha, ano cha Thlahpa Pathaihpa ta bâtituh awpa cha a châ,’ na tah ta.

³⁴ Cha cha hmô ha na ta, he he Khazohpa Sawchapawpa a châ tahpa nama hnohta ei pahnosa,” tah ta.

³⁵ A mylâpa ta Zawhana a duah ta, a pachupazy pano chhaota;

³⁶ Zisu a khiekhâ nota hmô ta, “Moh teh u, Khazohpa Mietakupa Taw huh!” tah ta.

³⁷ A pachupa pano chata a bie reipa cha thei ei ta, Zisu zi haw ei ta.

³⁸ Zisu a heih ta, ama vaw zipa hmô ta, ama hnohta, “Khâpa nama tlua?” tah ta. Âmo chata, “Rabai” (cha cha Pachutupa tahna a châ), “Khataih liata ma na y?” tah ei ta.

³⁹ Ano ta ama hnohta, “A vy ula, nama hmô aw,” tah ta. Chatanachata vawh ei ta, a yna cha hmô ei ta; cha nona chata ano hnohta y thlâh ha ei ta, zâlâ dawh palih rachhôh châ ta.

⁴⁰ Zawhana bie reipa cha theipa ta Zisu a zituhpazy pano hryta pakhapa cha Adru, Saimaw Pity unawhpa a châ.

⁴¹ Ano chata a hmiatuata a unawhpa Saimaw hmô ta a hnohta, “Mesia eima hmô haw,” tah ta, (cha cha Krista tahna a châ).

⁴² Chatanachata Zisu lâta a vaw chhi ta, Zisu ta ano cha vaw moh ta, “Zawhana, sawchapawpa Saimaw na châ, Sifasa bipa na châ aw,” tah ta, (cha cha Pity tahna châ ta a yzie cha Lôpanô tahna a châ.)

⁴³ A mylâpa ta Zisu chata Kalili râh lâ sie a chhuah taPhili hmô ta, a hnohta, “Na zi teh,” tah ta.

⁴⁴ Phili cha Besaida khihpa a châ, cha cha Adru nata Pity yna a châ.

⁴⁵ Phili chata Nathanael hmô ta, a hnohta, “A thâtih Mawsi ta ryhpa châbu liata a ropa nata hrohsopazy ta ama ropa kha, ano cha eima hmô haw, Nazari Zisu, Zawsi sawchapawpa cha,” tah ta.

⁴⁶ Nathanael chata a hnohta, “Nazari khih tawhta hmo phapa a pua thei ma?” tah ta. Phili chata a hnohta, “A vy la, mo tua,” tah ta.

⁴⁷ Zisu ta Nathanael ano lâta a vy haipa hmô ta, a thâtih reih ta, “Mo teh u, Izarel chyhsa hmeiseihpa, haidihaiduana rai a hnei leipa huh!” tah ta.

⁴⁸ Nathanael chata a hnohta, “Nâ ta kheihta e eina pahno chi?” tah ta. Zisu ta a hnohta, “Phili ta a cha aw hlâta, theiku thaby liata na y nona khata, ei cha hmô mâ tâh,” tah ta a chhy ta.

⁴⁹ Nathanael ta a hnohta, “Rabai, Khazohpa Sawchapawpa na châ! Izarelzy Beichaipa na châ!” tahpa ta a chhy ta.

⁵⁰ Zisu ta a hnohta, “Theiku thaby liata ei cha hmô mâ tâh, ei cha tahpa vâta nâ ngiapâ ma? Hezy hlâta hmo rônah viapa na hmô aw,” tah ta a chhy ta.

⁵¹ Zisu ta a hnohta, “Hmeiseihta ta, ei cha chho ei, a vâ a pahypa nata Khazohpa vâlyuhchâpazy Chyhsa Sawchapawpa chô liana heta chôpa nata kiahpa nama hmô aw,” tah ta.;