Nahu第1章

¹ Niniva khih phaohripa cha. Elkôsa chyhsa Nahu aluahna hmôpa châbu cha.

² ABEIPA cha hiatlia hmâhpa Khazohpa nata phuh la a hmâhpa a châ, ABEIPA chata phuh la ta, pathi-iana ta a bie; ABEIPA chata adyuhtuhpazy chô liata phuh la ta, a khakhaipazy châta pathi-iana a pachô pakhy.

³ ABEIPA cha nônaipa châ ta, hmo a tao thei ngaitapa châ ta, moleipa cha thai pachâsa aw vei. ABEIPA chata khisô liata thlihpi lâpi hnei ta,meihdozy cha a phei doh-lei a châ.

⁴ Tilaipi cha ra ta, pakua ta, chavah zydua chhao pakua khai ta; Basana nata Kamel chawh khai ta, Lebanaw pawpi cha a uah.

⁵ Tlâh laipazy cha ano vâta a chalyu ei ta, tlâh chyhpazy cha zao ei ta; a hmiakô liana chata a lei he roryhrapa ta y ta, khizaw nata a chhôh liata a ypa zydua chhaota.

⁶ A hiehâhna leina hmiakô liana chata ahy e a duah thei aw ta? A pathi-iana ru ngaitapa liana chata ahy e a y thei aw?A pathi-iana cha mei hawhta patlaipa châ ta, lôpanôzy cha a pazao khai.

⁷ ABEIPA cha pha ta, nôpo noh liata kuh a ipa a châ; ano liata ama ngâna a pahnietuhpazy cha a pahno.

⁸ Anodeikuacha ti laipa a khôpa hmâpa ta cha su leidia khaina cha patlôsa aw ta, a khakhaipazy cha a zohpa lâta a chadaipai aw.

⁹ ABEIPA chakhiapa ta khazia e na pachâ? Ano chata chhâ pathlana a patlôsa aw; rietheina ei nona tlô aw vei.

¹⁰ Hlohzy hawhta ypa ta ama kresawti dopa chata a dâpa ta pachiepa hawhta y hra sala, sâhkô raohpa hawh tlaita pahleipadia khaipa ama châ aw.

¹¹ Nâma liata a puapa chyhsa pakha ABEIPA chakhiapa ta hmo moleipa a pachâtuhpa, hmoparaona bie a pahruatuhpa a y.

¹² ABEIPA chata he tana heta a tah: “A chhuahdypa ta hluh hra ei sala, chhawh pathlahpa ta pahleipadiapa ama châ khai aw. Rietheipa ta cha vaw chhorei haw hra ei sala, rie cha pathei khao aw veih ei na.

¹³ Atahmâ cha na rao tawhta raopaky cha ei thlie aw, nama chahryna rizy cha ei chhie khai aw.

¹⁴ ABEIPA chata na kyh liata bie pie ta: “Na mo chi tawhta hiepa châ khao leipa aw ta; na khazohzy o tawhtapa nohthlahpa taopa nata nohthlahpa leipazy cha pahleipadia aw na ta. Na thlâ ei tao aw, molei tlôh chi ta,” tah ta.

¹⁵ Tlâhzy liata thâtihpha tlôkheipa ta, dyhna bie tlâh awhkheituhpa phei cha moh tua! Hy Zudah y, na kyhchhizy cha zi la, na bietaipazy cha patlô teh, moleipa chata cha sie pakhô khao tlôh leipa aw ta, pahleipadia pathlah hapa a châ haw.