Ephesi mozy第1章

¹ Pawla, Khazohpa khonazie hawhta Krista Zisu apôstôl chata— Mopathaihpa Ephesi khih liata a ypa Krista Zisu liata ngâchhihpazy lâna chata:

² Khazohpa eima Paw nata Abeipa Zisu Krista tawhtapa ngiachhiena nata adyhna nama hnohta y mawh sy.

³ Eima Beipa Zisu Krista Khazohpa nata Paw cha reithaipata y mawh sy, ano chata avâ suzy liana khita Krista liana chata thlahpa lâ byhnâ to maniah pie ta.

⁴ A kyhpachâna liata pathaihpa nata seina hnei leipata ano hmiakô liata eima y thei nawpata aleilô y hlâta Krista liata maniah a tlypa hawhna khata.

⁵ A ngiachhiena rônahzie reithai awpata, ano khopata a lynazie hawhta,

⁶ Zisu Krista zawhzi ta ano chata saw ta tao awpata maniah a raochhielie hawpa vâta, cha ngiachhiena cha kho ngaitapa liana chata a saipata maniah pie ta.

⁷ A thisaih vâta ano liana chata chatlaina eima hnei, a ngiachhiena hnei thluzie lymâ hawhta eima hmoparaonazy a ngiahthaina cha,

⁸ cha ngiachhiena chata ano ta so ngaitapa nata aryhna pahno ngaitapata maniah a vaohei.

⁹ Khazohpa ta a chhuahnohna bienyupa pahno awpata maniah pasai ta,

¹⁰ ano abeina khonazie ta khizaw zydua Krista liata pakipata ypata, avâ liata nata alei liata hmo a ypa zydua ano liana chata sia pakipa châ nawpata.

¹¹ Khazohpa khopa a ryraonazie lymâ hawhta hmo ato a taotuhpa a chhuahpa hawhta raochhieliepa cha hawpata ano liana chata a ryu châta taopa eima châ,

¹² keimo Krista liata hnabeiseina a hnei tuapazy pi he a rônahna reithaina eima vaw châ nawpata.

¹³ Ano liana chata nâmo chhao, bie hmeiseihpa nama pachhana Thâtihpha cha nahthlie eichi ta, namâ ngiapâ ha tawhta ano liana chata Thlahpa Pathaihpa bietaipa châta ngiapata nama ypa kha.

¹⁴ Cha cha Khazohpa rônahnazie reithai nawpata ano eih tlai chatlai nawpata eima ryutona awpata bietaina a châ.

¹⁵ Cha vâna chata kei chhaota Abeipa Zisu liata ngiapâna nama hry liata a ypa mopathaihpa zydua chôta nama paluahsa tyhpa cha ei vaw thei nahta,

¹⁶ eima Beipa Zisu Krista Khazohpa rônahna Paw chata, ano pahnona kyh liata sona nata pahnopasiasana Thlahpa a cha pie thei nawpa ei ta,

¹⁷ ei thlahchhâna zy liana chata mo padopata nama chôta alynabie reipa bâh va na.

¹⁸ Nama pathipalôh mozy pavâhsapata ypata, ano awna hnabeiseinazy mopathaihpa sahlao liana chata a ryu to awpa rônahpa hnei thluzie zy,

¹⁹ athihpa hry tawhtapa a pathyu nota nata abeina zy, biehneina zy, hmotaotheina zy, ryureina zydua zy he khizaw liata dei châ leipata,

²⁰ khizaw a vaw tlô awpa liata chhao moh bipa to chô via syulyu ta, avâ suzy liata a chachâh lâta a patyusa nota Krista liata a hriapa a thatlôna hriazie lymâ hawhna khata.

²¹ Keimo ngiapâtuhpazy lâta a hmotaotheina lai ngaitanazie zy he kheihawhpa a châ tahpa nama pahno thei aw.

²² Khazohpa hmo ato a phei ry liata soh ta; ano cha ato chô liata luh châta awnanopa sahlao lâna chata a pie,

²³ awnanopa sahlao cha a pôhpa a châ, ato ta pabietuhpa pakina cha.;