Philipi mozy第1章

¹ Pawla nata Timawthy, Krista Zisu seizy chata—Krista Zisu liata mopathaihpa Philipi khih liata a ypa zydua lâta awnanopa hyutuhpazy nata chakaotuhpazy lâta chhao:

² Khazohpa eima Paw nata Abeipa Zisu Krista tawhtapa ngiachhiena nata adyhna nama hnohta y mawh sy.

³ Noh hmiatua chaipa tawhna khata atahmâ taihta thâtihpha phuana liata nama hlao tyhpa vâta,

⁴ ei châ theina maih ei ta ei Khazohpa lâta alynabie ei reih tyh,

⁵ nâmo zydua chata thlah ei chhâna maihta thapha ngaitapata hiah tyhpata.

⁶ Nâmo liata hmophapa tao a pathaotuhpa khata Krista Noh taihta a paki lymâ aw, cha tlai cha khâchâ angiapâ tlôh nata.

⁷ Nâmo zydua lâta cha hawhpa palôhrupa phaopa cha, kei châta cha â ngiahpa raina a châ, ei pathipalôh liata ei châ vaopa vâ ei ta, ei keihrai dainazy thâtihpha thaina bie ei reina liata nata ei pa-inazy liata chhao, nama zydua ta ngiachhiena cha nâ hlykheituhpazy châ tlôh eichi ta.

⁸ Krista Zisu thapasana chata nama zydua ta ei cha vâzie ei cha, Khazohpa na pahnokheituhpa a châ mâ tâh.

⁹ Chatawhcha nama kyhpachâna ta pahno pakina nata sona to a hnei pachai nawpata thlah ei chhâ tyhpa he,

¹⁰ chatanachata Khazohpa rônahna nata reithaina awpata Zisu Krista zawhzi ta siana thei a ypa chata biepata.

¹¹ Krista Nô châna chata a hmeiseihpa nata seina y leipa nama châ thei nawpata hmopha pachaipazy cha a pha nama tah thei aw.

¹² Unawh saih u, ei chô liata hmo a vaw tlôpazy kha, thâtihpha pathâsana awpa tlao a vaw châ tahpa nama pahno awpa ei khoh.

¹³ Chatanachata ei keihrai zy he pritôria pheisaih sahlao zydua hry liata nata mo hropa zydua lâna chata Krista vâta a châ tahpa a lâ haw.

¹⁴ Abeipa liata unawh a hluh viazy chhao chata ei keihraizy vâta khâchâ a vaw ngiapâpata, chi leipata Khazohpa bie chhona kyh liata ama ria a pha rili.

¹⁵ Thokha ta cha hiatliana nata eina vâ chhaota Krista bie tlâh ama awhkhei tyh, thokha deikua chata alypa vâta tlâh ama awhkhei tyh hra.

¹⁶ Hlao kha chata thâtihpha thaina bie reih awpata raopa ei châpa pahnopata kyhpachâna vâta ama chho tyh;

¹⁷ hlao kha deikua chata ei keihrai chô liana heta pachârôhna na baichha a chhuahpata, a hmeiseihpa châ leipata, eina vâta Krista bie tlao ama chho tyh.

¹⁸ Kheihtazie ta ma a châ tly? Khâpa hropa châ leipata, kyh to rai liata a pakheipata tlyma, a hmeiseihpata tlyma Krista bie chhopata ama ypa a châ, chazy liana chata aly na ta.

¹⁹ Cha cha ei châta thlah nama chhâna vâta nata Zisu Krista Thlahpa tawhta baona eina piepa vâta ei pachhana a vaw châ aw tahpa pahno tlôh na ta.

²⁰ Khâpa liata hmahta maophyupata y leipa aw na ta, riahpha ngaitapata ei y tyhpa hawhna heta, atahmâ chhao hrona vâta tlyma, thina vâta tlyma, ei pôhpa liata Krista palyupalihpata tlao ei y aw tahpa ei hnabeiseina nata ei byuhna lymâ hawhna heta.

²¹ Kei châta la hro he Krista châ tlôh ta, thi chhao hlaona a châ.

²² Sapa hrona he ei tovyuh a châ khiahta cha, raihria phapa ei pazao thei aw. Cha tana chô chhaota a kheihawhpa ma ei tlyh aw tahpa pahno va na.

²³ A liah liana heta a pachâna pahno leipata ei y, sie ta Krista hnohta y khona ei hneipa vâta, cha cha pha via ngaita tlôh ta.

²⁴ Châhrasala nâmo vâta sapa liata y thlâh hapa he tlao a byuh via.

²⁵ Cha cha khâchâ ei ngiapâpa vâta ei y thlâh ha aw tahpa ei pahno, ngiapâna liana chata nama laiseih nawpa nata namâ ly nawpata nama zydua hnohta ei y thlâh ha aw tahpa ei pahno,

²⁶ chatanachata nama hnohta ei y awpa vâta einâ palaikheina eichi cha, Krista Zisu liata thata a châ rili thei nawpata.

²⁷ Khâparai châ sala nama hro yzie cha Krista thâtihpha nata a hmie tua se, chatanachata nâmo cha vaw hmô hra aw ei sala, nama hnohta y vei hra aw sala, thlahpa miakha liata a ipata a duahpata palôhrupa miakha ta thâtihpha ngiapâna bie a châkheipata tei chyupata dyutuhpazy khâpa kyh liata hmahta chi leipata nama y tahpa

²⁸ nama thâtih ei pahno thei aw. Cha cha âmo chata leidia awpa ama châpa pahnosana sia ngaitapa a châ, nâmo châta deikua cha pachha awpa nama châpa pahnosana sia ngaitapa tlao a châ. Cha chhao cha Khazohpa tawhtapa a châ.

²⁹ Krista vâta ano namâ ngiapâpa dei châ leipata, ano vâta pasa nama tao awpa chhao pasaipa châ tlôh ta,

³⁰ adyuhna keima liata nama hmô tyhpa, atahmâ chhao keima liata a y tahpa nama pahnopa, cha tlai cha nama hnei haw hra hih.;